د کار او ټولنيزو چارو وزارت، په نږدې راتلونکي کې د کارموندنې شرکتونو ټولنې او نړيوالو شريکانو په همکارۍ يو لوی کنفرانس جوړوي.
د کار او ټولنيزو چارو سرپرست بشير احمد ته ينج د کارموندنې شرکتونو ټولنې له استازو سره په کتنه کې وويل، چې د دې ټولنې او نړيوالو شريکانو په همکارۍ به نږدې راتلونکي کې د مهارتونو د تصديق ورکولو، د اړينو مهارتونو د تثبيت او بهر ته د کارګرانو د ليږلو پروسې نهايي کېدو اړوند يو لوی کنفرانس جوړ کړي.
ښاغلي ته ينج د بېکارۍ را کمولو کې د خصوصي سکتور ونډه مهمه و بلله و يې ويل، چې خصوصي سکتور او کارګرانو ټولنه چې بهر ته د ماهرو کارګرانو ليږلو مسوليت په غاړه لري، تر دې مهاله يې کړنې ښې او موږ يې ستايو.
د کار او ټولنيزو چارو سرپرست بهر ته د کارګرانو ليږلو موخه په هيواد کې د کار بازار باندې د فشار کمول او په کور دننه د بې کارۍ کچې را تيټول و ښوده.
ښاغلي ته ينج وويل، چې په دې برخه کې زيات کار شوی، ستونزې حل شوي او په نږدې راتلونکي کې به يې د عملي ليږد زيری له هيوادوالو سره شريک کړو.
بشير احمد ته ينج د کار او ټولنيزو چارو وزارت اړوند مسؤلينو او د وزارت ټولنيزو شريکانو ته سپارښتنه و کړه؛ څو د کنفرانس د ښه او ژر جوړيدو په موخه يوه تخنيکي کميټه جوړه کړي.
دې ناسته کې د کارو چارو مرستيال سيد عبدالکريم هاشمي وويل چې بهر ته د کارګرانو د ليږد پروسې کاميابي يو ملي آرمان او د کار او ټولنيزو چارو وزارت بنسټيزه دنده ده؛ نوموړي همدارنګه زياته کړه، چې هر کال په زرګونه هيوادوال له پوهنتونونو فارغيږي، اما د کار مارکيټ کې يې د جذب ظرفيت ډير کم دی، په همدې اساس د اوس مهال لپاره يې د حل لاره همدا بهر ته د ليږد پروسه دی.
د کاري چارو مرستيال زياته کړه، چې نږدې راتلونکي کې به د کارموندنې د ۲۰۰ تنه، ۵۰ تنه نړيوالو شريکانو او د کار او ټولنيزو چارو وزارت د ۳۰ تنه کارکوونکو په ګډون يو کنفرانس جوړ او د دې پروسې د نهايي کېدو او پيل اړوند به سره جدي بحث و کړي.
د افغانستان د کارموندنې شرکتونو د ټولنې مشر حاجي نورالله فدايي د خپلو خبرو په ترڅ کې وويل، چې له ښه مرغه د کار او ټولنيزو چارو وزارت په همکارۍ يې جوازونه ترلاسه کړي دي؛ نوموړي بې اعتمادي د دې پروسې د نه پيل کېدو برخه کې يوه لويه ستونزه ياده کړه، زياته يې کړه، تر دې مخکې ځينو مشخصو بدنامو شرکتونو هيوادوالو ته د دروغو ژمنې ور کړې وې؛ نو ځکه د خلکو تر منځ د شرکتونو اړوند اعتبار له منځه تللی دی، نوموړي و غوښتل څو هغو شرکتونو ته چې رسمي جوازونه لري د کارګرانو د نوم ليکنې اجازه ور کړل شي.
د کاري چارو مرستيال د خصوصي شرکتونو دې غوښتنې په ځواب کې وويل، چې تر دې مهاله ۱۴ بهرنيو هيوادونو له موږ څخه د اول درجه ماهرو کارکوونکو غوښتنه کړې ده؛ په همدې موخه د افغانستان دولت راتلونکې اونۍ کې د دريو هيوادونو( ترکيه، عربي متحده امارات او سعودي عربستان) استازو سره د بهرنيو چارو وزارت کې د پروسې د نهايي کولو اړوند ناسته لري؛ نو لازمه ده، چې د عملي کار پيل کيدو د اماده ګۍ لپاره، خصوصي شرکتونه د زونونو په سطحه د ماهرو کارګرانو د زده کړو لړۍ پيل کړي.
