ننګرهار کې ۳۰۰ اړمنو کورنیو ته د څه باندې ۲.۸ میلیونه افغانیو په ارزښت د نغدي پیسو مرسته ووېشل شوه
د ننګرهار ولایت د کار او ټولنیزو چارو ریاست په هڅو او همغږۍ؛ د یاد ولایت په لعلپورې ولسوالۍ کې ۳۰۰ اړمنو کورنیو؛ هري کورنۍ ته ۹۴۰۰؛ مجموعاً ۲۸۲۰۰۰۰ افغانیو په ارزښت د نغدي پیسو مرسته ووېشل شوه.
د مرستې د وېش پر مهال د ننګرهار ولایت د کار او ټولنیزو چارو رئیس مولوي مجیبالله عمر په خپلو خبرو کې د ټي ډي ایچ همکارې موسسې څخه د مننې سربېره وویل: مونږ هڅه کوو ترڅو په دې ولایت کې د فقر کچې د کمښت په موخه د مؤسساتو او خیریه بنسټونو مرستې جلب او اړمنو اشخاصو او کورنیو ته ېې ورسوو.
همداراز مولوي عمر د خپلو خبرو په وام له نورو ملي او نړیوالو همکارو موسساتو او خیریه بنسټونو څخه وغوښتل، چې د ورته پروګرامونو له لارې دې د اړمنو او بېوزلو کورنیو ملاتړ او لاسنیوی وکړي، ترڅو تر یو بریده په هېواد کې د بېوزلۍ کچه راکمه او خلک د ځان بسیاینې په لور ګام واخلي.
