د کار او ټولنيزو چارو وزارت او د افغانستان بيا ودانولو ملي مؤسسې ترمنځ تفاهم ليک لاسليک شو
دغه تفاهم ليک د څه باندې ۴ ميليونه افغانيو په ارزښت، زابل ولايت کې د فني او حرفوي زده کړو يوې پروژې پلي کېدو په موخه د کار او ټولنيزو چارو وزارت سرپرست وزير ملا عبدالولي څارنوال( حاجي وارث) او د افغانستان بيا ودانولو ملي مؤسسې مشر حاجي عبدالقدير عابد ترمنځ لاسليک شو.
د ياد تفاهم ليک له مخې د افغانستان بيا ودانولو ملي مؤسسه په پام کې لري؛ څو د زابل ولايت شينکي، اټغر او سيوري ولسواليو کې د خياطۍ، يخچال، مبايل ترميمولو او ليک لوست برخو کې ۵۰۰ هيوادوال و روزي.
د تفاهم ليک د لاسليک کولو پر مهال د کار او ټولنيزو چارو وزارت سرپرست ملا عبدالولي څارنوال( حاجي وارث) د مؤسسې له مسؤلينو و غوښتل؛ څو خپل ټول فعاليتونه له وزارت او ولايتي رياست سره په پوره همغږۍ او د ا.ا د اصولو، د کار او ټولنيزو چارو وزارت د مهارتونو د پراختيا رياست له خوا د جوړ شوي معياري نصاب مطابق مخته يوسي.
په همدې موخه جوړه شوې ناسته کې د افغانستان د بيا ودانولو ملي مؤسسې مشر حاجي عبدالقدير عابد ژمنه وکړه، چې هڅه کوي؛ څو د تفاهم ليک ټول موارد په پوره دقت او له وزارت سره په همغږۍ او د ا.ا د اصولو مطابق پلی کړي.
