د کار او ټولنیزو چارو سرپرست وزیر، په افغانستان کې د قطر هېواد د سرې میاشتې رئیس سره وکتل

د کار او ټولنیزو چارو سرپرست وزیر الحاج ملا عبدالمنان عمري نن د خپل کار په دفتر کې، په افغانستان کې د قطر هېواد د سرې میاشتې رئیس حسین بوتاني سره ولیدل.
د ناستې په پیل کې ښاغلي بوتانې؛ په افغانستان کې د خپلو فعالیتونو د مخینې، برنامو او لاسته‌راړنو او په اړه د کار او ټولنیزو چارو سرپرست وزیر ته معلومات ورکړل.
حسین بوتاني وویل: موږ خپلې ټولې پروژې د افغانستان اسلامي امارت د اصولو او اساساتو مطابق پلي کوو او یاد اصل ته ژمن یو، همداراز تعهد کوو؛ چې د ټولو راتلونکو پروژو په ډیزاین، تطبیق او متنوع کولو کې له هر  اړونده امارتي ارګان سره به په پوره همغږي کوو.
الحاج ملا عبدالمنان عمري د قطر هېواد د سرې میاشتې فعالیتونه وستایل او له هغوی څخه یې وغوښتل چې د ټولنې تر ټولو زیاتو زیانمنو اقشارو په ځانګړې ډول ماشومانو او نویو راستنېدونکو هېوادوالو پوره ملاتړ وکړي او ډیرۍ پروژې هغوی ته وقف کړي.
الحاج ملا عبدالمنان عمري د قطر هېواد د سرې میاشتې ټولنې سره ژمنه وکړه؛ چې د هغوی غوره او اغیزناک فعالیت لپاره د زمینې په برابرولو کې هر ډول همکاری ته چمتو دی.
په پای کې ښاغلي حسین بوتاني؛ زیانمنو اقشارو د پروژو د اسنادو په ژر بشپړیدو کې د همکارۍ غوښتنه وکړه.
د یادونې وړ ده؛ چې د قطر سره میاشتې ټولنه په افغانستان کې د صحت، اوبورسولو او په اضطراري حالاتو کې مرستندویه پروژې لري، او اوس‌مهال د نورو برخو ترڅنګ؛ د یتیمو او بې‌سرپرسته حمایت او د زیان‌منو اقشارو ملاتړ په برخه کې هم فعالیتونه لري