د کار او ټولنیزو چارو وزارت د مالي او اداري چارو مرستیال د «سټې ان» جرمنۍ موسسې له مسؤل سره ولیدل
د کار او ټولنیزو چارو وزارت د مالي او اداري چارو مرستیال مولوي دینمحمد حقبین د خپل کار په دفتر کې د «سټې ان» جرمنۍ موسسې له مسؤل طارق وردګ سره وکتل.
کتنه کې ښاغلي وردګ د خپلې موسسې د فعالیتونو په اړه د معلوماتو د شریکولو سربېره؛ څرګنده کړه چې دوی غواړي په جرمني کې مېشت د ځینو افغان متخصصینو په همکارۍ افغانستان کې د کار بازار د اړتیاوو سره سم د صنعت او ماشنیرۍ په برخو کې متخصصین وروزي. نوموړي زیاته کړه چې پدې رابطه یې ځینو ادارو او صنعتکارانو سره بحثونه کړي دي او هیله من دی، چې د کار او ټولنیزو چارو وزارت به هم له دوی سره همکاري وکړي.
ورپسې د کار او ټولنیزو چارو وزارت د مالي او اداري چارو مرستیال څرګنده کړه: دا چې افغانستان کې ډاډمن امنیت ټینګ او بهرنیو او کورنیو مؤسساتو او بنسټونو ته د کار او فعالیت زمینه برابره ده نو تمه کیږي چې دوی دې د اسلامي امارت پالیسۍ او اصولو په پام کې نیولو سره خپلې چارې پرمخ یوسي او په مختلفو برخو کې د افغانستان د خلکو لاسنیوی وکړي.
همداراز یې د (سټې ان) مؤسسې له مسؤلینو وغوښتل چې د متخصصو کادرونو د روزلو په برخه کې دې خپلو نظریاتو ته عملي بڼه ورکړي، چې په دې برخه کې به د کار او ټولنیزو چارو وزارت هغوی ته سهولتونه برابرکړي.
