د کار او ټولنیزو چارو وزارت مالي او اداري مرستیال، افغانستان لپاره د اروپایي ټولنې پراختیایي مرستو په ناسته کې ګډون وکړ.
افغانستان لپاره د اروپایي ټولنې پراختیایي مرستو ناسته د مالیې وزارت د مالي او ادراي مرستیال ښاغلی عبدالحبیب ځدران په مشرۍ د کار او ټولنیزو چارو وزارت مالي او اداري مرستیال ښاغلی مسعودالله اوریاخیل او د نورو وزارتونو ځینې مرستیالانو په ګډون د مالیې په وزارت کې جوړه شوه.
په یاده ناسته کې د اروپایي ټولنې پراختیایي همکاریو رئیس ښاغلی سټیفن لاک او د هغه سره مل تخنیکي ټیم د ویډیو کنفرانس له لیارې په یاده غونډه کې خبرې وکړې، چې په ترڅ کې یې د افغانانو لپاره د یادې ټولنې په نورو اضافي مرستو هم ټینګار وشو.
د کار او ټولنیزو چارو وزارت مالي او اداري مرستیال ښاغلی مسعودالله اوریاخیل، د یاد وزارت په لمړنیو طرحو او په راتلونکی کې د هغو د تمویل په څرنګوالی خبرې وکړې، زیاته یې کړه، چې د کار او ټولنیزو چارو وزارت د کار ملي انسټیټیوټ د جوړیدو لپاره هر اړخیزه طرحه تر لاس لاندې ده او په یاد ډګر کې د نړیوالو همکارانو مرستې ته اړتیا دی.
سربیره پر دې د کار او ټولنیزو چارو وزارت، د کار بازار له اړتیاوو او کاري فرصتونو ایجاد سره سم فني او حرفوي زده کړو مفصله طرحه ترتیب کړې ده، چې د نړیوالو تمویل کوونکو بنسټونو د جدي همکارۍ په صورت کې د هغې له لیارې کولای شو، چې څلویښت زره بیکاره ځوانانو ته د رورنې او د کار فرصتونه برابریدلی شي او همدارنګه ځلویښت زرو کوچنیو متشبثینو ته د هغوی سوداګریز پلان په مقابل کې نقدي بلاعوضه مرستې د هغوی کاروبار ملاتړ په موخه ورکول کیږي، چې د بیکاره ځوانانو لپاره د کار برابر فرصتونه منځته راتللی شي.
د کار او ټولنیزو چارو وزارت مالي او اداري مرستیال په خپلو خبرو کې زیاته کړه: د نړیوالو همکاره بنسټونو مالي ملاتړ په صورت کې د کار او ټولنیزو چارو وزارت غواړي، چې د هیواد په ۱۲ سرحدي او لږ پرمختللو ولایاتو کې د فني او حرفوي زده کړو دورې جوړې کړي، څو وکولای شي له دې لیارې په یادو سیمو کې د بیکارۍ کچه راټیټه کړي او د اقتصادي پراختیا لپاره ماهره کارګران و روزي.
په یاده غونډه کې همداراز د افغانستان حکومت او اروپایي ټولنې ترمنځ د همکاریو پر زیاتوالي، افغانستان لپاره د یادې ټولنې پر پرمختیایي مرستو، د حکومت له لمړیتوبونو په نظر کې نیولو سره د مرستو اغیزمنتیا، د پرمختیایي پروژو پر تمویل او تطبیق او نور مهمو موضوعاتو او مسائلو خبرې اترې وشوې.
د یادولو دی، چې اروپایي ټولنه د افغان حکومت له اصلي تمویل کوونکو شمیرل کیږي، چې په هیواد کې لمړیتوب ته په کتو سره اړینې پرمختییایي پروژې تمویلوي.
