د کار چارو معین د ایران اسلامي جمهوریت د کار، تعاون او ټولنیزې هوساینې وزارت له مرستیال وزیر سره وکتل
د کار او ټولنیزو چارو وزارت، د کار چارو معین الحاج مولوي محمدزاهد احمدزي د خپل کار په دفتر کې د ایران اسلامي جمهوریت د کار، تعاون او ټولنیزې سوکالۍ وزارت مرستیال وزیر ښاغلی سید مالک حسیني او ورسره مل پلاوي سره وکتل.
دواړو لوریو په افغانستان کې د فني او حرفوي زدهکړو په پراختیا، ایران اسلامي جمهوریت ته د ماهرو افغان کارګرانو پر لېږد، د کاري، علمي او عملي تجربو د تشریک او نورو مهمو موضوعاتو پر څرنګوالي تخنیکي بحث وکړ.
په پیل کې د کار چارو معین الحاج مولوي محمدزاهد احمدزي؛ د ایران اسلامي جمهوریت د کار، تعاون او ټولنیزې سوکالۍ مرستیال او ورسره مل پلاوي او همدارنګه په کابل کې د ایران سفیر محمدرضا بېکدلي ته د ښهراغلاست ویلو سربېره؛ په ایران کې د مېشتو غیرقانوني افغان کارګرانو لپاره د قانوني کاري جوازونو په ورکولو کې د اسانتیاوو برابرولو، افغانستان کې په کمي او کیفي ډول د فني او حرفوي زدهکړو د پروګرامونو د پراختیا، په همغږۍ سره د ګډو تخنیکي او حرفوي روزنیزو پروګرامونو جوړولو، د فن او حرفې او همدارنګه د کار بازار کې د ایران د کامیابو تجربو د تشریک غوښتنه وکړه.
د کار چارو معین زیاته کړه: اوسمهال بېکاري د افغانستان لویه ننګونه ده او د هغې په حل کې د ګاونډي هېواد مرستې او تجربې دواړه اړینې دي.
ورپسې د ایران اسلامي جمهوریت د کار، تعاون او ټولنیزې هوساینې وزارت مرستیال وزیر ښاغلي سید مالک حسیني هم په خپلو خبرو کې وویل: ایران اسلامي جمهوریت چمتو دی، ترڅو په قانوني ډول د کارګرانو په تنظیم، د ماهرو او مسلکي کاریګرو په تبادلې، په بېلابېلو برخو کې د فني او حرفوي زدهکړو د لنډمهاله او اوږدمهالو پروګرامونو په لاره اچولو او په ټوله کې د کاري تجربو د تشریک لپاره له خپل ګاونډي او ورور هېواد افغانستان سره هراړخیزه همکاري وکړي.
ښاغلي سید مالک حسیني زیاته کړه: هېله لرو چې د بصیر حرفوي زدهکړو مرکز ته پاملرنه زیاته شي، په ایران کې مېشت غیرقانوني ګډوال، قانوني هویتي مدارک ترلاسه کړي او ایران اسلامي جمهوریت ته د غیرقانوني کارګرانو د تګ مخنیوی وشي، ترڅو قانوني اعزام ته لاره هواره شي.
ښاغلي سید مالک حسیني ژمنه وکړه؛ چې د پورته ذکر شویو موضوعاتو په حل سره ایران اسلامي جمهوریت چمتو دی؛ چې هر کال تر دو سویو زرو کاري ویزې افغانانو ته ورکړي.
په پای کې دواړو لوریو د کاري فرصتونو، د کاري بازارونو د اړتیاوو د تثبیت، د فني او حرفوي زدهکړو، کډوالو چارو او نورو موضوعاتو د حل او فصل لپاره په یوې ګډې کاري کمیتې هوکړه وکړه، ترڅو بحثونو تعقیب کړي او د ایران اسلامي جمهوریت ته د کار او ټولنیزو چارو وزیر الحاج ملاعبدالمنان عمري او ورسره مل پلاوي په سفر کې هوکړهلیکونو ته لاره هواره شي.
