د کار چارو معین د بهر مېشتو افغانانو له یو شمېر استازو سره وکتل
د کار او ټولنیزو چارو وزارت د کار چارو معین الحاج مولوي محمد زاهد احمدزي د خپل کار په دفتر کې د بریتانیا، امریکا، فرانسې، اتریش او المان هېوادونو کې مېشتو افغانانو د ټولنو له استازو سره وکتل.
په پیل کې نورعالم حکیمیار او ورسره نور د بهرمېشتو افغانانو استازیو؛ د خپلو ستونزو، ننګونو، په بهر کې شته فرصتونو، لاستهراوړنو او راتلونکو پلانونو په اړه د کار چارو معین سره هر اړخیزه معلومات شریک او بهرنیو هېوادونو ته د انساني قاچاق د مخنیوي، ځوانانو ته په هېواد کې دننه د کاري فرصتونو د برابرولو؛ او د هېواد په لویو او ملي پروژو کې د هغوی له تجربو، تحصیل، تخصص او مسلکي کدرونو څخه د استفادې پرڅرنګوالي خبرې وکړي.
ورپسې د کار چارو معین الحاج مولوي محمد زاهد احمدزي په خپلو خبرو کې خپل هېواد ته د هغوی د راتګ له امله د ښه راغلاست سربېره وویل: د افغانستان اسلاميامارت په ځانګړي ډول د کار او ټولنیزو چارو وزارت هڅه داده ترڅو په هېواد کې دننه ځوانانو ته د کار زمینه برابره کړي، د نړۍ له اړتیا او معیارونو سره سم فني او حرفوي زدهکړې ورکړو او د امکان په صورت کې یې د اشتغال لپاره د ماهر کاریګر په توګه بهرنیو کارګرمنونکو هېوادونو ته ولېږو.
الحاج مولوي محمد زاهد احمدزي زیاته کړه، چې په ټوله نړۍ کې یوازې دولت نه شي کولای، چې د هغه هېواد ټول کاري ځواک په خپله اډانه کې جذب کړي، اوس په ټول هېواد کې هر ډول پانګهاچونې ته غوره شرایط برابر دي؛ نو له هېواد څخه بهر افغان سوداګرو، صنعتکارانو او پانګوالو څخه غوښتنه کوو، چې د هېواد په داخل کې پانګه اچونه وکړي ترڅو هېوادوالو ته په بېلابېلو برخو کې کاري فرصتونه برابر کړي.
په پای کې مولوي محمدزاهد احمدزي وویل: افغانستان؛ په بهر کې مېشت هېوادوالو تجربو، تخصص، مسلک او پانګې ته په ملي او لویو پروژو او همدارنګه د بیکارۍ په شمول لویو ټولنیزو ستونزو په حل کې اړتيا لري، او په یادو برخو کې د هغوی هر ډول څیړنیزې طرحې په ورین تندي مني.
