د کار چارو معین د کامایر شرکت له اجرائیوي رئیس سره وکتل
د کار او ټولنیزو چارو وزارت؛ د کار چارو معین الحاج مولوي محمد زاهد احمدزي د خپل کار په دفتر کې د کامایر شرکت له اجرائيوي رئیس کپتان جاهد عظیمي او مل پلاوي سره وکتل.
په پیل کې د کار چارو معین الحاج مولوي محمد زاهد احمدزي میلمنو ته ښهراغلاست سربېره په خپلو خبرو کې د کامایر شرکت د کار او فعالیت او همدارنګه د نوموړي شرکت د کارکوونکو د حقوقو له تأمین څخه خوښي وښوده او له ښاغلي عظیمي څخه يې وغوښتل، چې په استخدام کې شفافیت، د ظرفیت لوړونې په موخه د لنډمهاله او اوږدمهاله برنامو د تطبیق، د کار کوونکو د مزد او د مزد د څرنګوالي، رخصتیو، کاري انضباط، امتیازاتو او تشویقي مواردو، د البسې او په کاري چاپېریال کې د تحفظاتي وسایلو استعمال او ایمني موارد په جدي توګه تطبیق کړي.
همداراز مولوي احمدزي د خپلو خبرو په دوام د کار او ټولنیزو چارو وزارت د اصولو او قوانیو په نظر کې نیولو سره له ټولو هوایي شرکتونو سره په ځانګړي ډول د کامایر شرکت سره د هر ډول همکاریو ډاډ څرکند کړ.
په پای کې د کامایر شرکت رئیس کپتان جاهد عظیمي هم د خپلو فعالیتونو، لاسته راوړنو او ستونزو په اړه د معلوماتو شریکولو سربېره د کار او ټولنیزو چارو وزارت اړوند تقنیني اسنادو د غوره تطبیق ژمنه وکړه.
