د کار چارو معین په کنړ ولایت کې راستنېدونکو هېوادوالو ته د استوګنیز ښارګوټي په پرانېستلو کې ګډون وکړ
د کار او ټولنیزو چارو وزارت د کار چارو معین مولوي محمد زاهد احمدزي؛ تورخم ښارګوټي ته له سفر وروسته؛ کنړ ولایت ته لاړ او هلته یې د افغانستان اسلامي امارت د ریاستالوزراء اداري مرستیال مولوي عبدالسلام حنفي سره مل د راستنېدونکو هېوادوالو لپاره د استوګنې یو پنډغالي په پرانیستلو کې برخه واخیسته.
د پرانېست په مراسمو کې مولوي عبدالسلام حنفي وویل: موږ خپلو هېوادوالو ته له اوږده مهاجرت وروسته خپل ټاټوبي ته د بېرته راګرځیدو هرکلی وایو او د افغانستان اسلامي امارت د نظام د یو مسئول په توګه ژمنه کوو ترڅو هر افغان وګړي په ځانګړي توګه نويو راستنېدونکو هېوادوالو ته د امکان تر بریده د ژوند اسانتياوې برابرې کړو او هغوی ته د استوګنې، سرپناه، کاروبار او صحت په برخو کې سهولتونه برابر کړو، چې ښې بېلګې یې په ننګرهار او کنړ ولایتونو کې د پنډغالو پرانېستل دي.
بېرته راستنیو شویو هېوادوالو ته په خطاب کې د کار چارو معین مولوي محمد زاهد احمدزي هم په خپلو خبرو کې وویل: د کار او ټولنیزو چارو وزارت ژمن دی؛ چې خپلو امکاناتو ته په کتو سره تاسو ته د کار او فعالیت زمېنه برابره کړي او په خپل هېواد کې ستاسو له تجربو، تحصیل او مهارت څخه استفاده وکړي.
مولوي محمد زاهد احمدزي زیاته کړه: د چارو د آسانوولو په موخه د کار او ټولنیزو چارو وزارت د معلوماتو ذخیروي سیستم هم جوړ کړی دی؛ چې هلته ستاسو د شهرت سربېره، ستاستو مسلک، تخصص او تجربه هم ثبتیږي؛ چې په راتلونکې که به هم د کار او ټولنیزو چارو وزارت او هم امارتي او خصوصي سکتورونه ترې د کار موندنې په برخه کې استفاده وکړي.
