ننګرهار کې د ۱۰۵ تنو شاقهکاره ماشومانو پر کورنیو نغدي مرستې وویشل شوې
د ننګرهار ولایت د کار او ټولنیزو چارو ریاست په هڅو، د جلالآباد ښار د ۱۰۵ تنو شاقهکاره ماشومانو له والدینو سره د دوه اعشاریه شپږ میلیونه افغانیو نغدي مرسته وشوه.
د یادو مرستو د وېش پرمهال د ننګرهار ولایت د کار او ټولنیزو چارو رئيس مولوي فریدالله حقاني خپلو خبرو کې څرګنده کړه: دې مرستو کې د هر ماشوم کورنۍ ته ۲۵۵۰۰ افغانۍ په نقدي توګه ورکړل شوې، ترڅو هغوی له دې لارې خپلو ماشومانو ته کوچني کاروبارونه برابر کړي؛ او دې سره به وکولای شي له یوې خوا ماشومان له شاقه کارونو راوګرځوي او له بلې خوا به هغوی ځانته حلاله نفقه پیداکړي.
مولوي حقاني د ماشومانو له والدینو و غوښتل، چې خپل ماشومان د شاقه کارونو پر ځای د دیني او عصري علومو د زدهکړو په منظور؛ مدارسو او ښوونځیو کې شامل کړي.
د یادولو وړ ده؛ چې یاده مرسته د ماشوم ساتنې نړیوالې مؤسسې په مالي همکارۍ د شاقهکارو ماشومانو پر کورنیو وویشل شوه.
