هېواد کې د ماشومانو د کار مخنيوي پروژې پرانسته

افغانستان کې د ماشومانو د کار مخنيوي( د ماشومانو د کار له منځه وړلو) پروژه؛ نن رسما د کار او ټولنيزو چارو وزارت مرستيالانو، کار نړيوال سازمان مشر او ټولنيزو شريکانو استازو له لورې پرانستل شوه. 
ناسته کې د افغانستان لپاره د کار نړيوال سازمان مشر رامين بهزاد د خوښۍ په څرګندولو سره د ماشومانو کار يو سيمه ايزه ستونزه ياده کړه او ټولنيزو شريکانو په همکارۍ يې د يادې پروژې د ښه پلي کېدو اړوند ژمنه وکړه. 
د کاري چارو مرستيال محمد اجمل شاه پور بيا د خپلو خبرو په ترڅ کې قانوني او اقتصادي ستونزې، د پوهاوي نشتوالی او په دې اړوند د کورنيو تيټ فکر د ماشومانو د کار بنسټيز عوامل و بلل، زياته يې کړه، چې د افغانستان دولت د کار نړيوال سازمان سره ژمنه کړې او پر خپله ژمنه پابند دی. 
ښاغلي شاه پور د ماشومانو د کار مخنيوي برخه کې د کورنيو او علماوو رول مهم ياد کړ و يې ويل چې د کورنيو، علماوو او د دې ستونزې اړوند د ملي اجماع د نشتون له امله د دې ستونزې له منځه وړل ستونزمن کار دی. 
په ناسته کې د کار ور کوونکو او ټولنيزو شريکانو استازو هم خبرې وکړې؛ د ماشومانو کار مخنيوی يې يوه مهمه هيله ياده کړه؛ دوی همدارنګه ناامني، بېوزلي، په مخدره توکو د والدينو روږدي کېدل، کم کاري مزد، دومداره جنګ، کرونا ويروس او ځينې نورې ستونزې د ماشومانو د کار بنسټيز عوامل ياد کړل او ژمنه يې وکړه چې د ټولنيزو شريکانو په توګه به هر اړخيره همکاري و کړي. 
د ماشومانو د کار مخنيوي پروژې پرانسته کې د بهرنيو چارو وزارت، ګډو ګټو او برتانيا پراختيا برخو استازو هم په انلاين توګه خبرې وکړې او ژمنه يې وکړه چې افغانستان سره او بيا په ځانګړې توګه د هغو پروژو اړوند چې د زيانمن شوي ماشومانو ملاتړ کوي، مالي همکاري و کړي.  
پای کې د ټولنيزو چارو مرستيال غلام حيدر جيلاني د ناستې جمع بندۍ ترڅنګ، د ماشومانو د ملاتړ قانون تصويب کېدل د افغانستان دولت په ځانګړې توګه د کار او ټولنيزو چارو وزارت له مهمو لاسته راوړنو څخه ياد کړ، زياته يې کړه: د ټولنيزې ساتنې ملي پاليسي او کاري لارښود( د ماشومانو د ملاتړ صندوق لارښود) هم د جوړيدو په حال کې ده. 
ښاغلي جيلاني هيله څرګنده کړه، چې د ماشومانو د ملاتړ صندوق د طرزالعمل په جوړيدو سره به و کولای شي، چې بېوزله کورنيو سره مرسته شي او د ماشومانو د دروند کار مخه به هم و نيول شي. 
د ټولنيزو چارو مرستيال و ويل: اوس مهال په کابل، ننګرهار، باميان او بلخ ولايتونو کې د ماشومانو د ملاتړ مرکزونه لرو؛ چې دې مرکزونو له لارې مرز شوي او د مسلحانه پيښو قرباني شوي ماشومان ساتل کيږي او تر څيړنو وروسته يې خپلو کورنيو ته سپاري. 
غلام حيدر جيلاني همدارنګه و ويل، چې د حجز بديل مرکزونه چې اوس مهال يوازې کابل کې شته، په پام کې ده چې نږدې راتلونکي کې ټول هيواد کې هم جوړ شي.
د ويلو دی، چې ۲۰۲۱ کال د کار نړيوال سازمان له لوري د ( د ماشومانو د کار مخنيوي) په نامه نومولی شوی دی؛ همدارنګه هر کال د جون دولسمه د ماشومانو د دروند کار مخنيوي ورځې په توګه نمانځل کيږي او تمه ده چې تر ۲۰۲۵ کال پورې به په جنوبي آسيا کې د ماشومانو کار څخه په بشپړه توګه مخنيوی و شي.