د کار او ټولنيزو چارو وزارت سرپرست د مرسي کور مؤسسې رييس سره وکتل.
د کار او ټولنيزو چارو وزارت سرپرست ملا عبدالولي څارنوال( حاجي وارث) د افغانستان لپاره د مرسي کور موسسې رييس ښاغلي جک سره خپل کاري دفتر کې وکتل.
دې ليدنه کې دواړو لوريو د مرسي کور مؤسسې د فني او حرفوي زده کړو پروژې او د يادې پروژې اړوند د هوکړه ليک لاسليکولو اړوند خبرې وکړې.
د مرسي کور دفتر مشر د خپلو خبرو په ترڅ کې د يادې پروژې پيل کيدو اړوند خبرې وکړې و يې ويل، چې ياده پروژه به هرات او کندهار ولايتونو کې پلي شي؛ خو په لومړي سر کې د کار او ټولنيزو چارو وزارت سره د يادې پروژې اړوند هوکړه ليک اړين و باله؛ نوموړي زياته کړه که چيرته د يادې پروژې اړوند هوکړه ليک لاسليک نه شي؛ نو ياده پروژه به نږدې ورځو کې د تمويل کوونکو لخوا لغوه اعلان شي، چې دا به د افغانانو په ځانګړې توګه د هرات او قندهار خلکو لپاره يو لوی فرصت ضايع کول وي.
د کار او ټولنيزو وزارت سرپرست ملا عبدالولي څارنوال( حاجي وارث) ورته پروژې د افغانانو لپاره مهمې و بللې و يې ويل چې موږ د ټولو هغو موسسو هوکړه ليکونه چې د فني او حرفوي زده کړو برخه کې کار کوي، لاسليک کوو؛ خو هڅه کوو دغه هوکړه ليکونه په دقيق توګه و څيړو؛ څو د ټولو پروژو پيسې په دقيق او د امارت اسلامي د شرايطو او پاليسو په رڼا کي مصرف شي.
ملا عبدالولي څارنوال( حاجي وارث) همدارنګه وړانديز وکړ؛ څو ياده پروژه د ولايتونو( قندهار او هرات) په سطحه نه بلکې د زونونو په سطحه پلي کړل شي؛ څو د زونونو په سطحه د نور ولايتونو خلک هم ترې برخمن شي.
دې ليدنه کې هوکړه و شوه، چې راتلونکې سه شنبه به د دواړو لوريو( کار او ټولنيزو چارو وزارت او مرسي کور مؤسسې) تخنيکي ټيمونو سره ګډه ناسته و کړي او د هوکړه ليک اړوند به تر هر اړخيز بحث وروسته د يادې پروژې د هوکړه ليک لاسليک کولو او کار پيل کولو اړوند پريکړه و شي.
