د کار او ټولنیزو چارو وزارت لخوا د څه باندې ۴ میلیونه ډالرو په ارزښت د هوکړه لیکونو لاسلیک

د کار او ټولنیزو چارو وزارت د مالي او اداري چارو مرستیال مولوي دین محمد حقبین نن د یوې ناستې په ترڅ کې له یوشمېر کورنیو او بهرنیو همکارو مؤسسو سره د څه باندې څلورمیلیونه ډالرو په ارزښت هوکړه لیکونه لاسلیک کړل.
ناسته کې چې د کار او ټولنیزو چارو وزارت ځینو رئیسانو هم ګډون درلود،  مالي او اداري چارو مرستیال وویل: د افغانستان اسلامي امارت ژمن دی چې د خلکو په خاص ډول د اړمنو او زیانمنو کسانو د ژوند د ښه والي لپاره لازمې او زیاتې هڅې وکړي. همداراز یې ټینګار وکړ چې کورنۍ او بهرنۍ مؤسسې دې هڅه وکړي ترڅو خپلې پروژې په لرې پرتو سیمو کې چې له خدماتو محرومې پاتې شوې دي عملي کړي او هم دې د افغانستان د اسلامي امارت اصول او پالیسي په پام کې و نیسي.
د مؤسساتو په استازیتوب حبیب الله وردګ،  د کار او ټولنیزو چارو وزارت له لورې د سهولتونو د جوړېډو او هوکړه لیکونو دلاسلیک له امله مننه څرګنده او ژمنه وکړه چې د مؤسساتو چارې به له دې وزارت سره په همغږۍ پرمخ بیايي.
د ویلو ده چې له کورنیو او بهرنیو مؤسساتو سره دیارلس عنوانه هوکړه لیکونه د افغانستان د اسلامي امارت د ( داخلي او خارجي مؤسساتو او انجوګانو د فعالیت او چارو سمون طرزالعمل) په رڼا کې لاسلیک شول چې مجموعي ارزښت یې څلوراعشاریه یو میلیون ډالر وو او د فن او حرفې، روزنتونونو، د بشري مرستو وېش او له ماشومانو څخه د ملاتړ برخې یې عمده موخې وې چې دا پروژې به افغانستان شموله وي او له مخې به یې  ۲۳۴۰۰ تنو ته خدمات ترسره کیږي.