د کار عالي شورا د جوړېدو په اړه د همغږۍ ناسته وشوه
د کار ملي کانفرانس د موخو د تعقیب په منظور؛ د کار او ټولنیزو چارو وزارت د کار چارو معین مولوي محمد زاهد احمدزي په مشرۍ، د صعنت او سوداګرۍ وزارت معین مولوي احمدالله زاهد او د مختلفو خونو د استازو په حضور کې د کار عالي شورا د جوړېدو په اړه بحثونه وشول.
ناسته کې د کار چارو معین مولوي محمد زاهد احمدزي مېلمنو ته د ښه راغلاست ویلو سربېره په دې برخه کې د پخوانیو ناستو په اړه معلومات شریک او زیاته یې کړه: د کار او ټولنیزو چارو وزارت د افغان کاریګرو څخه د ملاتړ او هغوی ستونزو ته د مناسبو او منطقي حللارو د پیداکولو په منظور د کار عالي شورا جوړوي، چې په دې سره به د افغانستان اسلامي امارت، د کارفرمایانو او کاریګرو ترمنځ د همغږۍ ساحه لاپراخه او له دې لارې به هېوادوالو ته د غوره خدماتو د وړاندې کولو په برخه کې چټکتیا راشي.
مولوي محمد زاهد احمدزي د خپلو خبرو په دوام د کاریګرو او سوداګرو له ونډې څخه په مننې سره څرګنده کړه: له نېکه مرغه د کار ملي کانفرانس له موخو څخه یوه موخه د کار عالي شورا رامنځته کېدل وو، چې په دې برخه کې ټول باید په مشترک ډول همکار پاتې شو.
ورپسې د کسبګرو اتحادیې، د سوداګرۍ او پانګې اچونې خونې، صنایعو او معادنو او زراعت د خونو استازو په خپلو خبرو کې د کار عالي شورا د جوړېدو په اړه د کار او ټولنیزو چارو وزارت هڅې وستایلې او هیله یې وښوده، ترڅو دا شورا رامنځته او دخيل لوري په کې د کاریګرو ستونزو د حل او د دوی د حقوقو په منظور په ګډه توګه کار وکړي.
په پای کې د صنعت او سوداګرۍ وزارت معین مولوي احمدالله زاهد هم په خپلو خبرو کې د کار عالي شورا د جوړېدلو او په هغه کې د کاریګرو او کارفرمایانو له آدرسونو د یوې واحدې استازولۍ په اړه خبرې وکړې او په دې اړه یې د همکارۍ ډاډ هم څرګند کړ. د صنعت او سوداګرۍ وزارت معین همداراز زیاته کړه، چې د مختلفو خونو او اتحادیو سره به ناستې کوي، ترڅو شته ستونزو ته د حللارو موندلو وروسته د کار عالي شورا د جوړېدو لپاره عملي اقدام ته زمینه برابره شي.
