بهرنيو وګړو ته د کاري ویزو د ورکړې په پروسه کې د اسانتیاوو په موخه د همغږۍ ناسته ترسره شوه
د کار او ټولنیرو چارو وزارت د کار چارو معین الحاج مولوي محمد زاهد احمدزي په مشرۍ او د مالیې، بهرنیو او کورنیو چارو، اقتصاد او د صنعت او سوداگرۍ وزارتونو د استازو په حضور؛ بهرنیو وګړو ته د کاري ویزو د ورکړې په پروسه کې د اسانتیاوو رامنځته کولو په موخه د همغږۍ ناسته ترسره شوه.
په پیل کې د اړوندو ادارو استازو د کاري ویزو د ورکړې په برخه کې د خپلو فعالیتونو او لاسته راوړنو د شریکولو ترڅنګ، د اړینو اسنادو د برابرولو، د همغږۍ د لا پیاوړتیا او د اړتیا وړ تخنیکي مسایلو په اړه خپل نظریات او وړاندیزونه شریک کړل. ترڅو له مخې یې بهرني پانګوال،وګړي، متخصصین او کاریګر وکولای شي د قانوني اصولو په چوکاټ کې، مختلفو برخو هېوادوالو ته لازم او ګټور خدمات وړاندې کړي.
ورپسې د کار چارو معین الحاج مولوي محمد زاهد احمدزي په خپلو خبرو کې د دوی د پخوانیو همکاریو څخه د مننې او قدرداني سربېره د کاري ویزو د پروسې د اسانه کولو پر اړتیا ټینګار وکړ او وویل، چې د کاري ویزو لپاره یو روڼ، ګړندی او اسانه سیسټم باید رامنځته شي، ترڅو په دې برخه کې شته ستونزې حل او بهرني وګړي د افغانستان اسلامي امارت د اصولو او پالیسو مطابق په بېلابېلو برخو کې په قانوني توګه په کارونو وګمارل شي
