د کار او ټولنيزو چارو وزير سره د افغانستان لپاره د قطر سفير ليدنه
د کار او ټولنيزو چارو وزير بشير احمد ته ينج د افغانستان لپاره د قطر هېواد سفير سعيد بن مبارک الخيارين سره خپل کاري دفتر کې وکتل.
پيل کې د کار او ټولنيزو چارو وزير بشير احمد ته ينج د افغانستان دولت او خلکو په استازيتوب د سولې خبرو لپاره د قطر هېواد د فرصت برابرولو څخه مننه وکړه زياته يې کړه: بهر ته د افغان کارګرانو د ليږد بهير کې يو لړ ستونزې شته، چې د قطر هېواد دې برخه کې موږ سره همکاري کوي او ترې مننه کوو.
د کار او ټولنيزو چارو وزير د افغانستان او قطر هېواد تر منځ د هوکړې پر ګټو په ځانګړې توګه بهر ته د کارګرانو د ليږد پر بهير خبرې وکړې؛ همدارنګه نوموړي قطر هېواد ته د افغانستان د بهرنيو چارو وزارت له لارې د کار او ټولنيزو چارو وزارت له خوا د هيواد څلورو زونونو کې د روزنتونونو د جوړيدو اړوند هم خبرې وکړې، چې په راتلونکي کې به يو تخنيکي ټيم د يادو روزنتونونو جوړيدو بهير بشپړيدو په موخه قطر هيواد ته سفر وکړي، ښاغلي ته ينج همدارنګه د قطر سفير څخه د روزنتونونو فارغانو ته د تحصيلي بورسونو برابرولو برخه کې هم د همکارۍ غوښتنه وکړه.
وروسته بهر ته د کارګرانو د ليږد رياست رئيس ذکرالله حفيظي هم قطر هيواد سره د ۲۰۰۸ کال د لاسليک شوي هوکړه ليک اړوند چې هر درې کاله وروسته تمديديږي، خبرې وکړې و يې ويل: اوس مهال افغانستان کې درې ډوله کارګر ( ماهر کارګر، نيمه ماهر کارګر او عادي کارګر) شته، چې د کار او ټولنيزو چارو وزارت له خوا يې ملاتړ کيږي او د دوه سوه زره شا او خوا ماهر او نيمه ماهر کارګر دې وزارت سره ثبت دی، چې بهر ته د ليږد لپاره تيار دي، نوموړي وويل چې اوس مهال قطر هيواد کې ۴۵۰۰ افغان کارګر په کار بوخت دي.
ښاغلي حفيظي د کار او ټولنيزو چارو وزارت رهبرۍ ته وړانديز وکړ، څو د هوکړې پر بنسټ قطر هيواد ته سفر وکړي او د دواړو هيوادونو د پلاوو د کلنۍ غونډه کې ګډون وکړي او ۲۰۲۱ کال کې رسما د کارګرو د ليږد بهير پيل شي.
د افغانستان لپاره د قطر هيواد سفير خپلو خبرو کې د کار او ټولنيزو چارو وزير ته د تاييد رايې اخيستو په پار مبارکي وويله، ټولو ذکر شويو برخو کې يې د همکارۍ ژمنه وکړه او و يې ويل چې قطر هيواد د سولې خبرو څخه ملاتړ کوي؛ نوموړي وويل د دواړو هيوادونو خلک مسلمانان او وروڼه دي، د بې ګناه افعانانو له وژلو زوريږو او دا زموږ اسلامي او انساني دنده ده، څو د سولې برخه کې همکاري وکړو، نوموړي همدارنګه وويل چې قطر هيواد کې د ۴۵۰۰ افغان کارګرو له کار څخه هم راضي يو.
پای د قطر سفير د ټولو غوښتنو په قبلولو سره وړانديز وکړ؛ څو د کارګرو د ليږد بهير تر رسمي پيل وړاندې يو تخنيکي ټيم قطر ته سفر وکړي او تخنيکي خبرې يې نهايي کړي.
د قطر سفير همدارنګه وويل چې تر راتلونکو دوه درې اونيو به د کار او ټولنيزو چارو وزارا رهبري، سفارت ته دعوت او د ذکر شويو مواردو اړوند به هر اړخيز بحث وکړي.
