باميان ولايت ته د کار او ټولنيزو چارو وزير کاري سفر
د کار او ټولنيزو چارو وزير بشير احمد ته ينج د يو لوړ رتبه پلاوي په ملتيا باميان ولايت ته سفر وکړ او د زيانمن شويو ماشومانو څخه د ملاتړ مرکز يې پرانست.
د کار او ټولنيزو چارو وزير د ياد مرکز پرانستې مراسمو کې وويل، چې ياد وزارت په نوي مالي کال کې د باميان ولايت روزنتون را منځ ته کولو او کارموندنې برخو کې جدي پاملرنه لري.
بشير احمد ته ينج د باميان والي سيدانور رحمتي سره په کتنه کې د کارموندنې، کاري فرصتونو را منځ ته کولو، د کار او ټولنيزو چارو رياست پراختيا او د ياد رياست د ستونزو پر حل خبرې وکړې.
د باميانو والي او مسؤلينو ياد ولايت کې د فقر اړوند خبرې وکړې و يې ويل، چې باميان ولايت کې ګڼ شمير کاري فرصتونه شته او اړتيا ده؛ څو جدي پاملرنه ورته و شي.
د کار او ټولنيزو چارو وزير د باميانو والي د نظرونو او وړانديزونو اوريدلو وروسته وويل، چې د ياد ولايت د کار او ټولنيزو چارو رياست د وزارت جدي ملاتړ لري او د رياست اړوند ستونزې به په نږدې وختو کې حل شي.
د کار او ټولنيزو چارو وزير وويل چې جګړو، فقر او ګډوډۍ له امله هيوادوال په ځانګړې توګه يتيمان زيات ملاتړ ته اړتيا لري او په دې برخه کې به جدي کار وکړي.
ښاغلي ته ينج زياته کړه، چې د ماشومانو د ملاتړ مرکز کې به هغه ماشومانو چې زيانمن او د ژوند تيرولو وس نه لري، و روزي.
د کار او ټولنيزو چارو وزير و ويل: نوي مالي کال کې ګڼ شمير پلانونه شته او هڅه به وکړو؛ څو د کارموندنې، فقيرو ماشومانو ته د رسيدو او نورو برخو کې کار وکړو.
د ويلو ده، چې د کار او ټولنيزو چارو وزير به باميان ولايت ته د کاري سفر په ترڅ کې مدني ټولنو، ملي سوداګرو او رسنيو استازو سره هم وګوري او د ستونزو د حل او زيانمن شويو ماشومانو د لا ښه ملاتړ په برخه کې به ورسره خبرې وکړي.
