د کابل ولایت په شکردرې ولسوالۍ کې پر ۴۲۱ تنو کاري توکي وویشل شول
په هیواد کې د ماهرو کارګرانو د ثابت شغل او ځانبساینې په موخه د کار او ټولنیزو چارو وزارت په مدیریت او همغږۍ او د سرف افغانستان مؤسسې په مالي لګښت، د کابل ولایت په شکردرې ولسوالۍ کې، څه د پاسه لس میلیونه افغانیو په ارزښت، د ۲۱ حرفو په ۴۲۱ ماهرو ګارګرانو؛ کاري وسایل وویشل شول.
په هغو مراسمو کې چې په همدې موخه د شکردرې ولسوالۍ کې جوړ شوي وو؛ د کار او ټولنیزو چارو وزارت د کار د چارو معین مولوي محمد زاهد جان آغا په ګډون، د وزارت د فني او حرفوي زدهکړو د مراکزو د تنظیم رئیس مولوي عبدالواحد فایز، د شکردرې ولسوال ملاشریفالله مسلم، د افغانستان لپاره د سرف افغانستان مؤسسې (Serve Afghanistan) عمومي رئیس کنیډي دهانابالا هم ګډون درلود.
په پیل کې د کار او ټولنیزو چارو وزارت د کار د چارو معین مولوي محمد زاهد جان آغا خپلو خبرو کې وویل: د سرف افغانستان مؤسسې له یادو مرستو څخه مننه کوو؛ د نورو مرستو د جلب لپاره هم هلې ځلې کوو او له ټولو ملي او نړۍوالو بنسټونو غواړو چې په دې ډګر کې له افغانستان سره مرسته وکړي ترڅو د اشتغال په برخه کې هیوادوال ځانبساینې ته ورسیږي او همداشان تر ډیره کچه په هیواد کې د بیکارۍ کچه راټیټه شي.
په عونډه کې د سرف افغانستان مؤسسې عمومي رئیس کنیډي دهانابالا د کار او ټولنیزو چارو وزارت د مشرتابه له پوره همکارۍ څخه د مننې ترڅنګ؛ زیاته کړه: د کابل ولایت په امید کمپ کې له نشهیي توکو رغیدلو اشخاصو ته د کاري وسایلو له ویش وروسته له نیکهمرغه نن د شکردرې په ولسوالۍ کې په یوویشتو بیلابیلو حرفو کې ۴۲۱ کورنیو ته د دوی د حرفو په نظر کې نیولو سره کاري وسایل وویشل شول.
نوموړي زیاته کړه: هوډ لرو چې یاده لړۍ کندهار، لغمان او ننګرهار ولایتونو ته هم وغځوو او د روان میلادي کال ترپایه به په ۱۳۰۷ نورو کورنیو هم د هغوی د لیوالتیا پر بنسټ کاري توکي ووشو.
