د پغمان ولسوالۍ له محلي ادارې او مشرانو سره مشورتي ناسته ترسره شوه
د کار او ټولنیزو چارو سرپرست وزیر الحاج ملا عبدالمنان عمري په هدایت د کابل ولایت له ولسوالیو څخه امارتي روزنتونونو ته د مستحقو یتیمو او بېسرپرسته ماشومانو د جذب په موخه، دهسبز، بګرامیو، چهارآسیاب، ګلدرې او فرزې ولسوالیو وروسته د کار او ټولنیزو چارو وزارت پلاوي د پغمان ولسونو، علماوو، ملکانو او مسئولینو سره مشورتي ناسته وکړه.
غونډې ته د کار او ټولنیزو چارو وزارت د روزنتونونو رئیس مولوي محمد اصغر صفدري؛ په ټولنه کې د یتیم او بېسرپرسته ماشومانو په غوره کفالت او حفاظت له ټینګار سربېره زیاته کړه: د کار او ټولنیزو چارو وزارت هوډمن دی؛ چې یوازې د کابل په ولایت کې سږ کال د ۴۰۰ تنو په شا وخوا کې تر ټولو ډېر مستحق یتیم او بېسرپرسته ماشومان خپلو روزنتونونو ته جذب کړي، چې هلته د هغوی تعلیم، تربیېو اعاشې او اباتې، صحت او سرپناه ټول خدمات موجود دي.
مولوي محمد اصغر صفدري؛ په یادو ولسوالیو کې د سیمهایزو مسؤلینو، علماوو او ملکانو له استازو وغوښتل، چې مستحقو ماشومانو په پیدا کولو کې مرسته او همکاري وکړي.
د پغمان علماوو او ملکانو د همکارۍ تعهد سربېره د کار او ټولنیزو چارو وزارت دا اقدام او نوښت وستایه او هېله یې وښوده، چې دا کار به وکولی شي په ټولنه کې د یتیمو او بېسرپرسته ماشومانو له تجرید او انزوا څخه مخنیوی وکړي او د ټولنې دا زیانمن قشر به خپلو حقونه ته ورسیږي.
د یادولو وړ ده چې؛ نوموړی پلاوی به د کابل د نورو پاتې ولسوالیو له محلي مسئولینو، علماوو او ملکانو سره هم دا ډول ناستو ته دوام ورکړي.
هېره دې نه وي؛ چې دا بهیر د هېواد په ولایتونو کې هم پیل شوی دی؛ ترڅو له دې لارې وکولای شو، چې بېوزله، یتیم او بېسرپرسته ماشومان امارتي روزنتونونو د هر اړخیز ملاتړ لپاره جذب شي.
