کابل کې له فني او حرفوي زدهکړو څخه ۱۹۸ تنه ځوانان فارغ شول
د کار او ټولنیزو چارو وزارت؛ د فني او حرفوي زدهکړو د مراکزو د تنظیم ریاست په هڅو؛ ۱۹۸ تنه ځوانان له زیان سره د مخ اقشارو او د جاپان یونسکو د فني او حرفوي زدهکړو په مرکزونو کې د نلدوانۍ، د تعمیراتو برېښنا او سولر سیستم، موبايل ترميم، يخچال او ایرکنډیشن او خياطۍ په حرفو کې تر شپږمیاشتنيو نظري او عملي زدهکړو وروسته فارغ او تصديق پاڼې ترلاسه کړي.
په همدې مناسبت جوړې شوې فراغت غونډې ته د فني او حرفوي زدهکړو د مرکزونو د تنظیم رئیس مولوي عبدالواحد فایز د اسلام مبارک دین له نظره د کار او کسب د ارزښت سربېره په خبرو کې وویل: د افغانستان اسلامي امارت په ځانګړي ډول د کار او ټولنيزو چارو وزارت د همکارو ادارو په همغږۍ هڅه کوي، چې ځوانانو ته په بېلابېلو برخو کې د کار بازار اړتیاوو ته په کتو د فني او حرفوي زدهکړو زمینه برابره کړي، ترڅو په هېواد کې تر یو بریده د بېکارۍ کچه راټيټه شي.
مولوي فایز د خپلو خبرو په دوام له فارغ شوو ځوانانو څخه وغوښتل، چې له ترلاسه شویو زدهکړو، تجربو او مهارتونو څخه په غوره توګه استفاده وکړي او خپلو کورنیو د حلالې نفقې د پیدا کولو وسیله وګرځي.
په پای کې د جاپان یونسکو همکارې موسسې رئیس یما فیروزي، د خپلو خبرو پر مهال د کار او ټولنیزو چارو وزارت له اغېزمنې همغږۍ او دوامداره همکاریو څخه مننه وکړه او د فني او حرفوي زدهکړو د ودې او پراختیا په برخه کې یې د خپلو همکاریو د لا پیاوړتیا ډاډ څرګند کړ.
د یادونې وړ ده، چې د جاپان یونسکو همکارې موسسې له لوري ۸۱ تنو فارغ شوي ځوانانو ته کاري وسايل هم ووېشل شول.
