په نږدې راتلونکي کې به د ماشوم ساتنې ملي او جامع پالیسي جوړه شي.
د ټولنیزو چارو مرستیال غلام حیدر جیلاني د دې مطلب په څرګندولو سره وویل، چې دغه پالیسي د یونسیف په تخنیکی او مالي مرسته د آی بي سي آر( IBCR) کاناډایي انستیتوت سره د یو قرارداد له مخې او د ټولو هغو ذیدخله ادارو او مؤسساتو سره چې د ماشومانو په برخه کې کار کوي، په مشوره جوړه شي.
غلام حیدر جیلاني د ماشوم ساتنې لپاره د پالیسۍ جوړولو رهبري کمېټې ناسته کې وویل: د رهبرۍ کمېټې جوړولو څخه موخه دا ده، څو یاده کمېټه د ماشوم اړوند طرح او ترتیب شوي اسناد مرور او په اړه یې خپل نظرونه د کار او ټولنیزو چارو وزارت، یاد انستیتوت او یونیسف ادارې سره شریک کړي او همدارنګه نهایي شوي اسناد هم تصویب کړي.
نوموړي زیاته کړه، چې د رهبرۍ کمېټې ننۍ جلسې موخه داده، څو ذیدخله کورنیو او بهرنیو ادارو سره د یاد قرارداد لنډ معلومات شریک، د رهبري کمېټې غړو لیست نهایي او پر کاري لایحو بحث کول دي.
د ټولنیزو چارو مرستیال وویل، چې یاده کمېټه کې د عدلیې، کورنیو چارو، پوهنې، عامې روغتیا، ارشاد حج او اوقافو وزارتونو، بشري حقونو خپلواک کمیسیون، ملل متحد، ملي او نړیوال مؤسساتو با صلاحیته استازي شامل دي، چې د کمیټې د غړو په غوښتنه او فیصله به په کې نورې ذیدخله ادارې هم شاملې کړي.
د ماشوم ساتنې لپاره د پالیسي جوړولو کمېټې په افتتاحیه غونډه کې چې د رهبري زیاتره استازو په کې برخه لرله، دوی د کار او ټولنیزو چارو وزارت دغه اقدام و ستایه او د پالیسۍ د لا غنامندۍ په برخه کې یې د خپل پراخ ګډون او همکارۍ ژمنه و کړه.
د ویلو دی، چې د کار او ټولنیزو چارو وزارت د روانې میاشتې په لومړیو کې د ( ۳۵۴۵۲۱) امریکایي ډالرو په ارزښت د آی بي سي آر ( IBCR) کاناډایي انستیتوت سره یوه قرارداد لاسلیک کړ، چې پر بنسټ به یې د ماشوم ساتنې یوه ملي او جامع پالیسي جوړه، د ماشوم ساتنې د قضیو موجوده مدیریتي سیستم به مرور او غني شي او همدارنګه د ماشومانو د ساتنې شبکې ریاست کارمندانو د ظرفیت لوړولو، مدیریتي سیستم لوړولو، د ماشوم ساتنې اړوند د تحقیق لارښود او معلوماتي بانک تقویت برخو کې به هم کار و شي.
