پنجشير ولايت کې د فني او حرفوي زده کړو مرکز ودانۍ او يو وړکتون تر رغوونې وروسته پرانستل شول.
د کار او ټولنيزو چارو وزير بشير احمد ته ينج؛ په داسې حال کې چې د ټولنيزو چارو مرستيال غلام حيدر جيلاني او ځينو مرکزي رييسانو يې هم ملتيا کوله؛ پنجشير ته د کاري سفر په ترڅ کې د ياد ولايت لپاره د فني او حرفوي زده کړو مرکز ودانۍ او يو باب وړکتون تر روغونې وروسته پرانستل.
ښاغلي ته ينج او مل پلاوي يې د پنجشير والي انجينير کمال الدين نظامي سره تر ليدنې وروسته د فني او حرفوي زده کړو څخه د شاګردانو فراغت غونډه کې ګډون وکړ.
فراغت غونډه کې د پنجشير ولايت والي، د کار او ټولنيزو چارو رييس او قومي مشرانو د فني او حرفوي زده کړو پر ارزښت خبرې وکړې؛ دوی همدارنګه د ياد ولايت د کار او ټولنيزو چارو رياست اړوند ستونزې د وزارت له رهبرۍ سره شريکې او د حل غوښتنه يې وکړه.
د کار او ټولنيزو چارو وزير بشير احمد ته ينج د پنجشير والي او قومي مشرانو د خبرو تر اوريدو وروسته وويل: له ښه مرغه ۱۴۰۰ مالي کال کې پنجشير ولايت ته شا او خوا پنځه ميليونه افغانۍ يوازې د فني او حرفوي زده کړو لپاره ځانګړې شوي دي.
نوموړي زياته کړه، چې موږ حرفې د هر ولايت او سيمې خلکو د غوښتنو پر اساس رامنځ ته کوو؛ ښاغلي ته ينج همدارنګه وويل چې هڅه به وکړي؛ څو د پنجشير ولايت لپاره له مخکې جوړو شويو قطعاتو څخه يو روزنتون هم جوړ کړي.
د ويلو دی، چې روان کال کې د پنجشير ولايت د کار او ټولنيزو چارو رياست له خوا؛ د فني او حرفوي زده کړو دو څانګو( موټر ترميم او خياطۍ) څخه ۱۸۰ تنه( انجونې او هلکان) فارغ او نن ورته د کار او ټولنيزو چارو وزارت رهبرۍ په حضور کې تصديق پاڼې و ويشل شوې.
