افغان ـ کوريا انستيتوت کې د نوي ښوونيز کال لپاره د شاګردانو شاملېدو په موخه، کانکور آزموينه واخيستل شوه.
دغه آزموينه چې افغان ـ کوريا د فني او حرفوي زده کړو انستيتوت کې واخيستل شوه، شا او خوا پنځه لس سوه تنه د نهم او دولسم صنف فارغانو په کې ګډون کړی وه.
د آزموينې پرانسته کې د کاري چارو مرستيال سيد عبدالکريم هاشمي و ويل: د کار او ټولنيزو چارو وزارت له بنسټيزو موخو څخه يو هم د فني او حرفوي زده کړو وړاندې کول دي، چې دې برخه کې افغان ـ کوريا د فني او حرفوي زده کړو انستيتوت يو له مهمو او پرمخ تللو انستيتوتونو څخه دی.
نوموړي زياته کړه، چې له دې انستيتوت څخه د شاګردانو د فراغت وروسته له فارغانو څخه بله اختصاصي آزموينه هم اخيستل کيږي، چې د شاګردانو د بريالي کېدو په صورت کې به د هغوی د فراغت سندونه د بهرنيو چارو وزارت او کار نړيوال سازمان له خوا تصديق شي، چې نړيوال اعتبار به و لري او د کار او ټولنيزو چارو وزارت اړوند بهر ته د کارګران د ليږد پروسه کې به هم همدغو شاګردانو ته لومړيتوب ورکړل شي.
د افغان ـ کوريا د فني او حرفوي زده کړو انستيتوت آمر ميرجلال الدين هشام بيا د خپلو خبرو په ترڅ کې و ويل: دې کانکور آزموينه کې شا او خوا پنخه لس سوه شاګردانو ګډون کړی، چې له دې ډلې به ۷۵۰ تنه هغه شاګردانو چې لوړې نمرې ترلاسه کړي، د دې انستيتوت اوو څانګو ( کمپیوتر، ولډنک کاری، انگلیسی، خیاطی، ساختمانی، د موتر ترميم او نلددواني) کې به شامل شي.
نوموړي زياته کړه: د سروې ګانو له مخې د دې انستيتوت ۷۰ سلنه شاګردان وروسته له فراغت څخه کارونه موندلي او يا يې هم خپله شخصي کاروبار پيل کړی دی.
د ويلو ده، چې دې انستيتوت کې ۸۰ سلنه درسونه عملي دی او د دې انستيتوت له رامنځ ته کېدو( ۲۰۰۴) را په ديخوا تر دې مهاله نږدې اته زره شاګردان له ياد انستيتوت څخه فارغ او ټولنې ته د خدمت په موخه وړاندې شوي دي.
