دنده او مسؤلیت امتیاز نه؛ بلکې یو امانت دی
دغه خبرې د اسلامي امارت د رئيس الوزرا مرستیال مولوي عبدالسلام حنفي د کار او ټولنیزو چارو وزارت د کار او مالي او اداري چارو مرستیالانو او ۱۶ نویو رئيسانو پیژند غونډه کې و کړې.
مولوي عبدالسلام حنفي، د خپلو خبرو په ترڅ کې مولوي مخدوم عبدالسلام سعادت د کار چارو او مولوي دین محمد حقبین د مالي او اداري چارو مرستیالانو په توګه د مبارکۍ ترڅنګ نوموړي د یادو معینتونو لپاره وړ کسان یاد کړل او د هیوادوالو لپاره یې ترې د ښه خدمت هیله و کړه.
نوموړي د کار او ټولنیزو چارو وزارت د وزارتونو په سطحه او د کار را منځ ته کولو برخه کې یو مهم وزارت یاد کړ؛ هیله یې څرګنده کړه، چې د ځوانانو لپاره د کار موندنې برخه کې واقعي کار و کړي؛ ښاغلي حنفي د ټولنیزو چارو برخه کې د بېوزلو او یتیمو ماشومانو لپاره د دې وزارت مسؤلین ته وړاندیز و کړ، چې دا د اسلامي امارت مکلفیت دی، چې د اسلامي امارت د مجاهدینو د یتیمانو ترڅنګ د هغو یتیمانو کفالت هم و کړي، چې پلرونه یې د مجاهدینو سره په جنګ کې له لاسه ور کړي دي.
وروسته د چارو ادارې مرستیال مولوي نورالحق د سرپرست وزیر او سرپرست مرستیالانو د ګمارنې اړوند د امیر المومنین حفظه الله حکم و لوست او نویو مسؤلینو ته یې په چارو کې د بریا هیله و کړه.
په دې ناسته کې د اقتصاد وزارت وزیر قاري دین محمد حنیف، د اسلامي امارت د ویاند مرستیال مفتي انعام الدین سمنګاني، د امارت غړي طالب جان ذکي، د کلیو او پراختیا وزارت مرستیال صلاح الدین ایوبي، د افغانستان لوی درستیز فصیح الدین فطرت او شیخ نقیب الله د کابل قول اردو د ارکان رئيس هم خبرې و کړې او له افغانستان څخه د اشغالګرو د ویستلو او مجاهدینو د زحمتونو او سرښندونو اړوند یې معلومات وړاندې کړل او نوې ګمارل شویو کسانو ته یې د مبارکۍ تر څنګ ور څخه د ښه خدمت هیله و کړه.
په غونډه کې د کار چارو نوي مرستیال مولوي مخدوم عبدالسلام سعادت او مالي او اداري چارو مرستیال مولوي دین محمد حقبین هم خبرې و کړې، د اسلامي امارت مشرتابه له باور څخه یې مننه و کړه او ژمن شول، چې په پوره اخلاص او د خپلو مشرانو په لارښوونه به د خپلو هیوادوال خدمت و کړي.
د غونډې په پای کې د کار او ټولنیزو چارو وزارت سرپرست څارنوال عبدالولي د میلمنو د راتګ څخه د مننې ترڅنګ؛ حیا، مهمانوازي او حب الوطن/ حب الایمان د افغانانو له ښو ځانګړنو څخه یاد کړل او ټولو نویو ګمارل شویو مجاهدینو ته یې د وطن سره د مینې په پار د ښه خدمت لارښوونې او سپارښتنې و کړې.
د ویلو دی، چې د کار او ټولنیزو چارو وزارت په وړاندیز او د ریاست الوزرا د عالي مقام په منظورۍ د کار او ټولنیزو چارو وزارت په مربوطاتو کې مولوي شرف الدین شرف د وزارت مقام د دفتر ریئس، مولوي دوکتور عنایت الله عادل د بشري قواوو او کاري چارو د تنظیم عمومي رئیس، مولوي محب الله حبیبي د پلان او پالیسۍ رئيس، مولوي عبدالواحد فایز د مهارتونو د پراختیا عمومي رئیس، محمد امین د تدارکاتو رئيس، مولوي حسین احمد د داخلي تفتیش رئيس، مولوي حضرت محمد طیب د بشري سرچینو رئیس، ریاض احمد د ټولنیزو چارو متخصص، مولوي حافظ عبدالرحمن بهرنیو وګړو ته د کار جواز ویشلو رئيس، مولوي میرحاتم د فني او حرفوي زده کړو مرکزونو د رئيس، مولوي عبدالولي حماد د دعوت او ارشاد رئيس، مولوي نجیب الله وقاد د نظارت او ارزونې د رئيس، مولوي نعمت الله د بهرنیو اړیکو رئيس، مولوي رحیم الله صراح د وړکتونونو تدریسي رئيس، مولوي محمد انور د تهیه مسکن د روزنتون رئيس او مولوي عبدالعزیز د ماشومانو ساتنې شبکې د رئيس په توګه ګمارل شوي دي، چې په جلا جلا توګه خپلو کارکوونکو ته ور و پيژندل شول.
