د افغانستان لپاره د کار نړیوال سازمان سرپرستې سره د کار چارو مرستیال لیدنه
د کار چارو مرستیال مولوي مخدوم عبدالسلام سعادت د افغانستان لپاره د کار نړیوال سازمان د کار نړیوالو معیارونو پروژې مسؤلې او سرپرستې میرمن مارګرید سره خپل کاري دفتر کې و کتل.
دې لیدنه کې دواړو لوریو د غوره کار پروګرام، کار نړیوالو معیارونو، نړیوالو کنوانسیونونو، د کارفرما، کارګرو او حکومت درې اړخیزه کار شورا اړوند هر اخیزې خبرې و شوې،
د کار نړیوال سازمان د کار نړیوالو معیارونو پروژې مسؤلې او سرپرستې د خپلو خبرو په ترڅ کې د یاد سازمان پر کړونو او فعالیتونو د کار چارو مرستیال سره معلومات شریک کړل او د اړوند چارو په لا ښه پرمختګ کې یې د همکارۍ غوښتنه وکړه.
د کار چارو مرستیال مولوي مخدوم عبدالسلام سعادت د کار نړیوال سازمان مسؤلینو ته د ښه راغلاست ترڅنګ؛ د بشري مرستو، کارموندنې او بیوزلۍ له منځه وړلو برخو کې کار په نړۍ کې یو له بهترینه خدمتونو څخه یاد کړ. مولوي مخدوم وویل، چې د کار او ټولنیزو چارو وزارت د یو مسؤل شخص په توګه نړیوالو ته خاص پیغام لري او هغه دا چې نړیوال باید د بشري مرستو پرځای له افغانانو سره زیات باید د کارموندنې پروژو برخه کې همکاري و کړي؛ ځکه بشري مرسې موقتي او د افغانانو درد نه شي دوا کولای او باید له افغانانو سره د داسې پروژو په تمویل او را منځ ته کولو کې همکاري و کړي؛ څو په کور دننه او بهر افغانانو ته د کار زمینه برابره او د بیوزلې له منځه وړلو لپاره یوه دایمي حل لاره پيدا شي.
د کار چارو مرستیال مولوي مخدوم عبدالسلام سعادت د افغانستان لپاره د کار نړیوال سازمان مسؤلینو نه جدي غوښتنه و کړه؛ څو د کار برخه کې د یو یو نړیوال مسؤل سازمان په توګه د یاد سازمان له نورو غړو هیوادونو سره د افغانانو غږ او غوښتنې شریکې او د همکارۍ غوښتنه و کړي.
مولوي مخدوم عبدالسلام سعادت د افغانستان لپاره د کار نړیوال سازمان مسؤلینو سره ژمنه و کړه، چې د وزارت اړوند کاري برخو کې به تل ورسره ښه همغږۍ او همکاري و لري او همدارنګه یې د یاد سازمان د ښې همغمږۍ او نړیوالې همکارۍ غوښتنه و کړه.
