د کار او ټولنیزو چارو وزارت څخه د امر بالمعروف، نهی عن المنکر او د شکایاتو اوریدلو وزارت د وفد لیدنه
د امر بالمعروف، نهی عن المنکر او د شکایاتو اوریدلو وزارت د شکایاتو اوریدلو او تصنیف رییس مولوي صدیق الله په مشرۍ او څلورو تنو نورو غړو؛ هریو: د شکایاتو د ارجاع او څیړلو رییس مولوي حجت الله پاچا، د تقنین او پالیسۍ رییس مولوي محب الله مخلص، د دعوت او ارشاد رییس مولوي عبدالحکیم حقاني او د یاد وزارت د نظارت او ارزونې رییس مولوي مخدوم غلام الله په غړیتوب یو وفد د کار او ټولنیزو چارو وزارت ته تشریف راوړی وو او د یوې غونډې په ترڅ کې یې په داسې حال کې یې د کار او ټولنیزو چارو وزارت کارکوونکو سره ولیدل چې د کاري چارو مرستیال وزیر مولوي مخدوم عبدالسلام سعادت، مالي او اداري چارو مرستیال وزیر مولوي دین محمد حقبین، د وزارت مقام د دفتر رییس مولوي شرف الدین شرف، د دعوت او ارشاد رییس مولوي عبدالولي حماد او د وزارت نور برخو رییسان هم ګډون درلود.
د امر بالمعروف، نهی عن المنکر او د شکایاتو اوریدلو وزارت څخه راغلي وفد رییس او غړو د خپلو خبرو په بهیر کې د شرعي حجاب توضیحي او تطبیقي طرح په باره کې چې د هیواد نومتو شیوخو له لورې برابره شوې ده او د افغانستان اسلامي امارت مشرتابه له لورې خلکو ته د یو فرمان په بڼه ابلاغ شوې ده معلومات ورکړل او وویل چې کار او ټولنیزو چارو وزارت ته زموږ د راتګ اصلي موخې: په وزارت کې د ښځینه مراجعینو او د ښځینه کارکوونکو له لورې د حجاب مراعاتول. په اداره کې د ښځینه کارکوونکو لپاره د بیل دفتر تنظیمول، د وزارت نارینه کارکوونکو صورت او سیرت په نبوي (ص) سنتو سینګارول او د وزارت په مقر کې په جمع باندې لمونځ ادا کول دي.
د کاري چارو مرستیال وزیر مولوي مخدوم عبدالسلام سعادت، د امر بالمعروف، نهی عن المنکر او د شکایاتو اوریدلو وزارت څخه راغلي پلاوی ته د کار او ټولنیزو چارو وزارت په استازيتوب د ښه راغلاست ترڅنګ وویل چې امر بالمعروف او نهی عن المنکر هغه عمل دی چې موږ ته د سمې لارې لارښوونه کوي او زموږ دین او دنیا دواړه غوره او نیکبخته کوي.
د کاري چارو مرستیال وزیر زیاته کړه: دا نظام په وینو او اوښکو منځته راغلی دی او که چیرې نن موږ اسلامي اوامر رعایت نکړو په دین او دنیا دواړو کې به زیان ووینو. مولوي سعادت د کار او ټولنیزو چارو وزارت په استازیتوب د امر بالمعروف، نهی عن المنکر او د شکایاتو اوریدلو وزارت څخه راغلي پلاوی ته ډاډ ورکړ چې د یاد وزارت کارکوونکي هر ځلې یاد پلاوی هر غږ ته لبیک ویلی دی او ژمنو کوو چې د الهي اوامرو په تطبیق به هر اړخیزه همکاري کوو.
وروسته؛ د امر بالمعروف، نهی عن المنکر او د شکایاتو اوریدلو وزارت څخه راغلي پلاوی د کار او ټولنیزو چارو په وزارت کې د امر بالمعروف او نهی عن المنکر وزارت د اوامرو له تطبیق څخه خوښی وښوده او وویل چې د کار او ټولنیزو چارو وزارت کارکوونکي په نبوي سنت سینګار دی او جمع لمونځ دپاره مناسب ځای لري او وروسته یې د ستر څیښتن تعالی له دربار څخه د کار او ټولنیزو چارو وزارت ټولو منسوبینو او مسوولینو ته په دنیا او آخرت کې د بریالیتوب او فلاح هیله وکړه.
غونډه د خیر او بریالیتوب نور توفیق او په ټولنه کې د الهي اوامرو د غوره تطبیق او خلکو ته نیکبختی په دعا سره پای ته ورسیده.
