د کار او ټولنیزو چارو وزارت دوه تنه نوي ګمارل شوي رئیسان خپلو دندو ته وپېژندل شول
د کار او ټولنیزو چارو سرپرست وزیر الحاج ملاعبدالمنان عمري، د دې وزارت د داخلي تفتیش د رئیس ملا شرفالدین شرف او د اداري او خدماتو رئیس په توګه حافظ محمد یعقوب خپلو دندو ته ور وپېژندل.
وروسته له هغې چې د ریاست الوزراء مقام حکمونه د کار او ټولنیزو چارو وزارت د مطبوعاتو مسؤل سمیعالله ابراهیمي له لوري ولوستل شول، د کار او ټولنیزو چارو وزارت سرپرست پداسې حال کې چې د وزارت ځینو رئیسانو او کارکوونکو هم حضور درلود؛ خپلو خبرو کې وویل: د چارو د ښه پرمختګ او خلکو ته د خدماتو وړاندې کولو په برخو کې اړینه ده چې اداراتو کې تغییر او تبدیل رامنځته او له دې لارې پروخت او مناسب اداري اجراآت ترسره شي، الحاج ملاعبدالمنان عمري هیله څرګنده کړه چې نوي ګمارل شوي رئیسان وکولای شي خپلو دندو کې د افغانستان اسلامي امارت د پالیسۍ او اصولو په پام کې نیولو سره د خدمت جوګه وګرځي.
د یادولو ده چې د کار او ټولنیزو چارو وزارت د وړاندیز او د ریاست الوزراء مقام د حکم په اساس ملاشرفالدین شرف چې تردې مخکې د وزارت مقام د دفتر رئیس پاته شوی، د داخلي تفتیش د رئیس په توګه او حافظ محمد یعقوب چې د ټولګټو وزارت د سالنګونو د ساتنې او څارنې د رئیس په صفت یې دنده اجرا کړې ده. د کار او ټولنیزو چارو وزارت د اداري او خدماتو د رئیس په توګه ګمارل شويدي.
