د کار او ټولنیزو چارو وزارت معینانو د اسلامي همکاریو سازمان د راغلي پلاوي له غړو سره وکتل؛
د کار او ټولنیزو چارو وزارت معینانو د خپل کار په دفتر کې، افغانستان ته د اسلامي همکاریو سازمان د راغلي پلاوي له ځینو غړو سره په لیدنه کې د مختلفو مواردو په اړه خبرې او بحثونه وکړل.
ناسته کې د ټولنیزو چارو معین شیخ عبدالبر مېلمنو ته د ښه راغلاست سربېره؛ هیله وښوده چې راغلی پلاوی دې د اسلامي همکاریو سازمان له لارې د افغانستان د وضیعت او مختلفو برخو کې د پرمختګونو او لاستهراوړنو په اړه حقایق له نړیوالو سره شریک او هڅه دې وکړي، چې اړونده برخو په ځانګړې توګه د یتیمو او بېسرپرسته ماشومانو څخه د ملاتړ او هم ځوانانو ته د کاري فرصتونو په جوړېدو کې د مختلفو اسلامي هېوادونو پاملرنه او مرستې جلب کړي. شیخ عبدالبر د کار او ټولنیزو چارو وزارت اړونده روزنتونونو کې یتیمو او بېسرپرسته ماشومانو ته د ژوندانه د سهولتونو د برابرولو او د وزارت د عمده فعالیتونو په اړه هم د پلاوي له غړو سره معلومات شریک کړل.
ورپسې د کار چارو معین مولوي محمد زاهد هم خپلو خبرو کې افغانستان ته د اسلامي همکاریو سازمان د پلاوي له راتګ څخه خوښي څرګنده او وویل: د کار او ټولنیزو چارو وزارت هڅه کړې، چې د بېکارۍ کچې د کمښت په موخه په ټول هېواد د ۵۲ مراکزو له لارې ځوانانو ته د فني او حرفوي زدهکړو او د کاري فرصتونو زمینه برابره کړي. ترڅنګ یې د بیکارۍ ستونزې ته د رسېدنې او هم د نویو کاري فرصتونو د ایجاد په موخه په نږدې راتلونکي کې د کار ملي کانفرانس ترسره او په کې د مختلفو امارتي، غیر امارتي، خصوصي سکتور، ملي او نړیوالو مؤسسو او بنسټونو ژمنې واخلي.
مولوي محمد زاهد د خپلو خبرو په دوام د اسلامي همکاریو سازمان د هڅو څخه په مننې سره له یاد سازمان څخه وغوښتل، دا چې افغانستان د څلورو لسیزو جګړو او ستونزو څخه راوتلی او د افغانستان د اسلامي امارت په بیا حاکمېدو سره بشپړ امنیت ټینګ او د بنسټیزو پروژو تطبیق ته مناسب بستر چمتو دی؛ نو هیله ده، چې وروستیو پرمختګونو ته په کتو او هم د افغانانو ستونزو ته د رسېدنې په موخه اسلامي هېوادونه خپل مسؤلیت ادا کړي، چې له شک پرته، په دې کې د اسلامي همکاریو سازمان ونډه او پاملرنه ډېره اړینه ده.
په همدې ترتیب د اسلامي همکاریو سازمان د کلتوري چارو عمومي رئیسې ډاکټر امینه الحجري افغانستان ته د خپل راتګ او ښې مېلمهپالنې څخه قدردانی څرګنده او وویل: له نېکمرغه دلته په راتګ سره جوته شوه، هغه تصویر چې ځینې رسنۍ یې د افغانستان په اړه خپروي ناسم او له حقایقو لېری دی. آغلې الحجري د خپلو خبرو په دوام زیاته کړه: افغانستان ته زمونږ د راتګ عمده موخه د افغانانو د ستونزو درک او د امکان تر بریده د اسلامي همکاریو د سازمان له آدرسه ورته رسېدنه ده، هڅه به کوو ترڅو د دې سفر څخه ترلاسه شوي کره معلومات د سازمان له غړو سره شریک او په متوقعه برخو کې د افغانستان خلکو ته د هغوی پاملرنه او مرستې جلب کړو.
د ویلو ده، چې اسلامي همکاریو سازمان د راغلي پلاوي غړو د کار او ټولنیزو چارو وزارت د فني او حرفوي زدهکړو له مرکز او روزنتون څخه لیدنه وکړه او پدې برخو کې یې د وزارت کړنې وستایلې.
