میدان وردګو ولایت کې ۲۰۰ تنو یتیمو او بېسرپرستو ماشومانو ته د روزنتون پرانېسته وشوه
د کار او ټولنیزو چارو وزارت د کار چارو معين الحاجمولويمحمدزاهد، میدان وردګو ولایت ته د خپل سفر په ترڅ کې، د دې ولایت د یتیمو او بېسرپرستو ماشومانو څخه د حمایت په موخه ۲۰۰ تنو ماشومانو ته د روزنتون پرانېسته وکړه.
په همدې موخه جوړه شوې ناسته کې، چې د ولایتي ادارې ځینو رئیسانو هم ګډون درلود؛ د دې ولایت د کار او ټولنیزو چارو رئيس مولوي عبدالغفور حیدري خپلو لنډو خبرو کې مېلمنو ته ښع راغلاست ويلو ترڅنګ، میدان وردګو ولایت ته د روزنتون د منظورۍ له امله یې د کار او ټولنیزو چارو وزارت د رهبرۍ د پاملرنې مننه او قدرداني وکړه.
ورپسې د میدان وردګو مرستیال والي حافظ سیدرحمن هم د اسلام له نظره د یتیمو ماشومانو د کفالت په اړه خبرې وکړې او په دې برخه کې د کار او ټولنیزو چارو وزارت له هڅو، پاملرنې او په ټول هېواد کې د روزنتونونو د فعالېدو له امله مننه وکړه. همداراز یې د ولایت له لوري د میدان وردګو ولایت له روزنتون سره د همکاریو ډاډ څرګند کړ.
په همدې ترتیب د کار چارو معین الحاج مولوي محمد زاهد له یتیمو او بېسرپرستو ماشومانو څخه ساتنه د ټولو ګډ مسؤلیت یاد کړ او څرګنده یې کړه: د افغانستان اسلامي امارت په حاکمیت سره، د کار او ټولنیزو چارو وزارت له لوري په ټول هېواد کې روزنتونونه فعال او په کې ګڼ شمېر ماشومانو ته د ژوندانه د لازمو سهولتونو، تعلیم، تربیې او روغتیايي خدماتو زمینه برابره ده. مولوي محمد زاهد ماشومانو ته په خطاب کې وویل: تاسو د بېسرپرستۍ او تنهایۍ احساس مهکوئ، د افغانستان اسلامي امارت هر مسؤل ځان مکلف ګڼي، چې پوښتنه مو وکړي، سهولت درته جوړ او ستونزو ته مو رسېدنه وکړي.
په پای کې یې ټینګار درلود چې د میدان وردګو ولایت د کار او ټولنیزو چارو ریاست منسوبین دې، د دې ماشومانو د ساتنې، پالنې، تعلیم او تربیې ته پوره پاملرنه وکړي او په دې برخه کې دې خپل مسؤلیتونه په ښه شکل ترسره کړي او هېڅ راز وظیفوي غفلت دې نه کوي.
