د ټولنیزو چارو معین د کونړ له مرستیال والي سره وکتل
د کار او ټولنیزو چارو وزارت، د ټولنیزو چارو معین الحاج مولوي عبیدالله امینزاده، کونړ ولایت ته په رسمي سفر کې د دې ولایت له مرستیال والي، مولوي عبدالله حقاني سره وکتل.
کتنه کې د ټولنیزو چارو معین د وروستۍ زلزلې له کبله د اووښتو ځاني او مالي تلفاتو له امله غمرازي څرګنده او په دې برخه کې یې د ټولو امارتي او غیر امارتي ادارو، عامو ولسونو، کورنیو او بهرنیو مرستندویو موسسو او خیریه بنسټونو د هڅو او فعالیتونو د ستاینې ترڅنګ زیاته کړه: د دا ډول طبیعي پېښو له وقوع څخه وروسته هم ځینو ادارو ته مسئولیتونه راجع کېږي، چې د کار او ټولنیزو چارو وزارت یې هم خپله دنده بولي، ترڅو یتیمو او بېسرپرستو ماشومانو او نورو زیانمنو اشخاصو ته رسېدنه، د دوی ملاتړ او کفالت وکړي او دا زموږ د سفر اساسي موخه ده، چې د ولایتي ادارې سره په همغږۍ په دې برخه کې همکاري وکړو.
ورپسې د کونړ مرستیال والي خپلو خبرو کې مېلمنو ته د ښه راغلاست سربېره، زلزلهځپلو هېوادوالو ته په مختلفو برخو کې د خدماتو د وړاندې کولو په اړه معلومات شریک او د زیانمنو اشخاصو په ځانګړې توګه ماشومانو د کفالت په موخه د کار او ټولنیزو چارو وزارت له پرېکړې څخه یې هرکلی او په دې لار کې یې د لازمو همکاریو ډاډ څرګند کړ.
ناسته کې د کونړ ولایت د کار او ټولنیزو چارو رئیس مولوي مجیبالله عمر هم د دې ریاست له لوري د ترسره شویو خدماتو په اړه معلومات وړاندې کړل او زیاته یې کړه، چې د وروستۍ زلزلې څخه د اغېزمنو ماشومانو او نورو اړمنو هېوادوالو ارقام موجود دي او هیلهمند یو، چې د وزارت مقام له لوري لازم امکانات برابر شي، ترڅو وکولی شو د هغوی کفالت ترسره او ورته خدمات وړاندې کړو. چې د ټولنیزو چارو د معین له لوري ورته د همکارۍ ډاډ ورکړل شو.
د یادولو ده چې په دې سفر کې د ماشوم ساتنې رئیس مولوي سعدالدین مطمئن او د روزنتون رئیس مولوي محمد اصغر صفدري هم د ټولنیزو چارو معین ملتیا کوي.
