د کونړ او ننګرهار ولایتونو ګڼ شمېر کارکوونکو ته روزنیزې اداري برنامې پیل شوې
د کار او ټولنیزو چارو وزارت د انسټیټوټ له لوري، د کونړ او ننګرهار ولایتونو د محلي ادارو کارکوونکو ته جلا جلا روزنیزې اداري برنامې په لار واچول شوې.
په همدې موخه جوړې شوې غونډې ته د کونړ ولایت مرستیال والي، مولوي عبدالله حقاني خپله لنډه وینا کې مېلمنو ته د ښه راغلاست سربېره، د کار او ټولنیزو چارو وزارت له فعالیتونو او برنامو څخه په نیکۍ یادونه وکړه او د برنامې له ګډونوالو یې وغوښتل، چې په روانو برنامو کې په خپل فعال حضور سره ولسونو ته د خدماتو د وړاندې کولو په بهیر کې له تر لاسهشویو تجاربو څخه ګټه واخلي.
ورپسې د کار او ټولنیزو چارو وزارت، د مهارتونو د پراختیا لوی رئیس مولوي رحیمالله صراح د یادو برنامو په پرانېست غونډو کې خبرې وکړې او مختلفو برخو کې یې د ورته برنامو په لار اچول د کارکوونکو د ظرفیت لوړونې، په ورځینو چارو کې د اصلاح او بهبود، د خدماتو د چټکتیا، سلسله مراتبو او په ټوله کې هېوادوالو ته د اغېزمنو او په خپل وخت خدماتو د ترسره کولو په لارو کې اړینې وبللې.
په همدې ترتیب د انسټیټوټ رئیس شریفالله شرافت هم د یادو درې ورځنیو برنامو په اړه رڼا واچوله او څرګنده یې کړه، چې په اداره کې د کارکوونکو د کاري اړیکو د تنظیم او هم د دفتري چارو او اداري مراسلاتو برنامې، چې د وخت اړتیاوو ته په کتو چمتو شوي دي، کولای شي، کارکوونکو ته په ورځنیو چارو کې لازم سهولتونه رامنځته کړي.
