د ښه کار تقديرول د کار د لا ښه والي او کار د زياتوالي سبب کيږي
دغه خبر د کار او ټولنيزو چارو وزير فيض الله ذکي د ۲۰ ملي او نړيوالو مؤسسو د کړنو څخه د ستاينې په غونډه کې و کړه.
په همدې موخه جوړه شوې غونډه کې فيض الله ذکي د ماشومانو وضعيت او ټولنيز خونديتوب ته په اشارې وويل، چې لا هم په هيواد کې د ماشومانو ټولنيز خونديتوب ته زياته اړتيا شته او ټولې مؤسسې او اړوند ادارې بايد په دې برخه کې په ښه همغږۍ لا زيات کار و کړي.
په غونډه کې د ځينو مؤسسو استازو هم خبرې و کړې، دوی د کار او ټولنيزو چارو وزارت له همکارۍ څخه د مننې ترڅنګ د ټولنيز خونديتوب په برخه کې د لا زياتو همکاريو او ښې همغږۍ ژمنه و کړه.
د غونډې په پای کې د کار او ټولنيزو چارو وزارت رهبرۍ له خوا لس ملي او لس نړيوالې مؤسسې، چې د ماشومانو او ټولنيز خونديتوب په برخو کې فعاليت درلود، د ښو کړنو په پار ورته ستاينليکونه ور کړل شول.
