افغان ـ کوریا د فني او حرفوي زده کړو انستیتوت نوی ښوونیز کال پيل شو.
د کار او ټولنیزو چارو وزارت اړوند، افغان ـ کوریا د فني او حرفوي زده کړو انستیتوت نوی ښوونیز کال د یو لړ مراسمو په ترڅ کې د کار چارو مرستیال سید عبدالکریم هاشمي له خوا پرانستل شو.
په همدې موخه جوړه شوې غونډ کې د کاري چارو مرستیال سید عبدالکریم هاشمي ، بریالیو شاګردانو ته د بریالیتوت او نوي ښوونیز کال د پيل کیدو مبارکي ترڅنګ زیاته کړه، حلال کسب او کار انسان ته عزت او وقار ور بښي و یې ویل، چې د حلال کسب او کار لپاره یوه ښه وسیله هم د فن او حرفې زده کول دي.
ښاغلی هاشمي وویل، جنګ د بیکارۍ محصول دی، دولت او خصوصي سکتور مکلف دي، څو په هیواد کې د سولې او آرامۍ ترڅنګ د بې کارۍ د له منځه وړلو لپاره هم لا زیاتې هڅې و کړي.
د کاري چارو مرستیال وویل، چې د کار او ټولنیزو چارو وزارت د یو پالیسي جوړونکي وزارت په توګه هڅه کوي، څو د کار موندنې په برخه کې ټول شریک وزارتونه او بنسټونه سره همغږي کړي، نوموړي زیاته کړه، چې د همدې همغږۍ د را منځ ته کولو په موخه د کار او ټولنیزو چارو وزارت په مشرۍ د کار عالي شورا جوړه شوې، چې د کارګرانو، کار ور کوونکو او دولت استازي یې غړیتوب لري.
غونډې ته د افغانستان لپاره د کوریا هیواد سفیر هم خبرې و کړې، نوموړي د نوي ښوونیز کال د مبارکۍ ترڅنګ زیاته کړه، چې کوریا هیواد به د افغان ـ کوریا انستیتوت کې یو دفتر پرانیزي او د دې مرکز له لارې به شاګردانو ته د کتابونو، مجلو او نورو اړینو تکنالوژیکي برخو کې خدمتونه وړاندې کوي.
همدارنګه په غونډه کې د افغانستان د صنایع ټولنې مشر سخي احمد پيمان د فن او حرفې د ارزښت او د افغان ـ کوریا مسؤل میرجلال الدین هشام هم د یاد مرکز اړوند د ښوونیز میتود په اړه خبرې و کړې او غونډه د دعایې په ویلو سره پای ته و رسیده.
