ماشومان په حرکت کې تر عنوان لاندې پروګرام رهبرۍ غونډه جوړه شوه.
دغه ناسته چې د ټولنیزو چارو مرستیال غلام حیدر جیلاني په مشرۍ جوړه شوې وه، په کې د UNICEF، UNHCR، IOM استازو هم برخه لرله، چې د ماشومان په حرکت کې پروګرام رهبري کمېټې پر کاري لایحې او د یو شمیر نورو ادارو په شاملو هر اړخیزې خبرې و شوې.
د ټولنیزو چارو مرستیال غلام حیدر جیلاني د ماشومانو په برخه کې د اروپایي ټولنې او نورو مرسته کوونکو هیوادونو څخه د مننې تر څنګ زیاته کړه، چې ماشومان په حرکت کې پروګرام د رهبرۍ کمیټې موخه د د پروژې په جریان کې د نظارت، لارښوونې، وکالت او تصمیم نیوونې له لارې د پروژې ښه پای ته رسول دي، هغه همدارنګه د هغو ماشومانو په اړه چې په ایران کې ژوند کوي او یا هم بیرته هیواد ته رد مرز کیږي خبرې و کړې او د یادو ماشومانو حالت یې خراب و ښود او د یادو ماشومانو ستونزو ته د رسیدو او اسانتیاوو پر برابریدو یې ټینګار و کړ.
ښاغلي جیلاني همدارنګه وویل، هغه ماشومان چې له ایران څخه په زور را ویستل کیږي، ورسره ښه رویه نه کیږي، زیاته یې کړه، هغه ډله ماشومان چې له ایران څخه په زور را ویستل کیږي، لازمه ده چې د هیواد په مرزي سیمو کې ورته یو مرکز جوړ شي، څو یاده ډله ماشومان تر پوښښ لاندې و نیسي او د ښې راتلونکې په پار ورته لازمې کړنې ترسره کړي او همدارنګه د پولیو ناروغۍ د انتقال څخه د مخنیوي په موخه لازمه ده، چې د پولیو واکسین خدمات هم ورته برابر شي.
په دې ناسته کې د UNICEF، UNHCR، IOM استازو هم د ماشومان په حرکت کې پروګرام د رهبرۍ د کارونو په ښه توګه پر مخ وړلو، کاري لایحې او نورو ادارو په شاملولو هر اړخیزې خبرې و کړې او پریکړه پر دې شوه، چې د عامې روغتیا، پوهنې او کډوالو چارو وزارتونه هم باید په رهبرۍ کمېټه کې شامل او د تخنیکي کارونو پر مخ وړلو لپاره د یوه تخنیکي کميټه هم جوړه شي.
د ویلو دی، چې په ۲۰۱۸ کال کې یونیسف ـ افغانستان د نړیوالې ټولنې سره یو قرارداد لاسلیک کړی وه، چې موخه یې پر هغو ماشومانو چې په ایران کې اوسیږي او یا هم له ایران څخه را ویستل کیږي، د هغوی پر راتلونکې او حقوقو پانګونه او د له یوه هیواد څخه بل هیواد ته د پولیو ناروغۍ څخه مخنیوی وه.
