د کار چارو معین د کارګرو روغتیا ته د زیانرسونکو شغلونو او حرفوي ناروغیو د مخنیوي په موخه د عامې روغتیا وزارت او د علومو اکاډمۍ له استازو سره وکتل
د کار او ټولنیزو چارو وزارت د کار چارو معین الحاج مولوي محمد زاهد احمدزي په مشرۍ د هغو شغلونو په اړه چې د کارګرو روغتیا ته زیان رسوي او د حرفوي ناروغیو د رامنځته کېدو لامل ګرځي د عامې روغتیا وزارت او علومو اکاډمۍ له استازو سره ګډه ناسته ترسره شوه.
په پیل کې د کار چارو معین راغلو میلمنو ته د ښه راغلاست سربېره وویل: کارګر د هر هېواد د اقتصاد د ملا تیر ګڼل کېږي؛ نو اړینه ده چې په زیانرسوونکو او خطرناکو شغلونو کې د خوندیتوب اصول په جدي ډول مراعات او عملي شي.
همداراز مولوي احمدزي د خپلو خبرو په دوام د کارکوونکو د حقوقو خوندیتوب، د مناسب کاري چاپېریال رامنځته کولو او د هغوی د هوساینې لپاره لازم تدابیر نیول د هرې ادارې اساسي مسئولیت وباله.
په پای کې د یادو ادارو استازو هم په خپلو خبرو کې د کارګرو د حرفوي ناروغیو د مخنیوي لپاره د اغېزمنو لارو چارو، د خوندیتوب اصولو د عملي کېدو او د کارکوونکو روغتیا د ساتنې پر اهمیت خبرې وکړې.
هېره دی نه وي؛ چې د عامې روغتیا او نورو امارتي ادارو په مرسته؛ د کار او ټولنیزو چارو وزارت هڅه کوي ترڅو هغه حرفي او شغلونه په ګوته کړي؛ چې په لنډمهال او اوږدمهال کې د کارګرو روغتیا ته زیان رسوي.
د یادولو ده، چې په یاده ناسته کې د کار چارو مشاور مولوي محمد کریم حنفي، د مطبوعاتو رئیس سمیعالله ابراهیمي او د کار او ټولنیزو چارو وزارت د اړوندو ریاستونو استازو هم حضور درلود.
