په شکردرې ولسوالۍ کې د ماشومساتنې کمېټه پرانیستل شوه
د کار او ټولنیزو چارو وزارت په هڅو؛ د ماشوم ساتنې ریاست له لوري دا ځل د کابل ولایت په شکردرې ولسوالۍ کې د یتیمو او بېسرپرستو ماشومانو ستونزو ته د رسېدو په موخه د د ولسوالۍ په کچه؛ د ماشومساتنې کمېټه پرانیستل شوه.
په همدې مناسبت جوړې شوې پرانیستغونډې ته د کار او ټولنیزو چارو وزارت د ماشوم ساتنې رئیس مولوي سعدالدین مطمئن په خپلو خبرو کې د اسلام له نظره د یتیمو او بېسرپرسته ماشومانو پر حقوقو، د هغوی د ستونزو پر حل، هغو ته د ژوندانه سهولتونو برابرولو او له خپلو کورنیو سره یې د بیاځلې یو ځای کولو پر ارزښت خبرې وکړي.
همداراز نوموړي د یادې ولسوالۍ له مسؤلینو څخه وغوښتل، چې د ماشومانو ستونزو ته د رسېدو په موخه د کار او ټولنیزو چارو وزارت سره په همغږۍ خپلې هلېځلې ونه سپموي.
ورپسې د شکردرې ولسوال الحاج قاري فدامحمد فدایي هم په خپلو خبرو کې په یاده ولسوالۍ کې د کار او ټولنیزو چارو وزارت له فعالیتونو څخه د مننې سربېره وویل: د ماشوم ساتنې کمېټې جوړول یو مثبت او ارزښناک ګام دي، چې په دې سره به د یتیمو او بېسرپرسته ماشومانو ستونزې تر ډیره بریده را کمې شي.
د کار او ټولنیزو چارو وزارت ژمن دی، چې د یادې کمېټې د پرانیستلو بهیر به د هېواد نورو ولسوالیو ته هم وغځوي.
