بلخ کې ۵۰۰ تنو له اعتیاد څخه رغېدلو اشخاصو ته د فني او حرفوي زدهکړو زمینه برابره شوه
د کار او ټولنیزو چارو وزارت د کار چارو معین الحاج مولوي محمد زاهد احمدزي، بلخ ولایت ته په خپل رسمي سفر کې، له اعتیاد څخه رغېدلو ۵۰۰ تنو ته د فني او حرفوي زدهکړو برنامه پرانېسته.
په همدې مناسبت جوړه شوې ناسته کې، چې د بلخ ولایت مرستیال والي او د ځینو نورو ادارو مسؤلینو هم حضور درلود، د کار چارو معین په خپلو خبرو کې وویل: د افغانستان اسلامي امارت په حاکمیت سره د مخدره توکو پر وړاندې جدي مبارزه شوې او د هغو کښت، پروسس او قاچاق صفر ته راټیټ شوي دي، ترڅنګ یې په ټول هېواد کې په نشهیي توکو د روږدو اشخاصو درملنه ترسره او هم د کار او ټولنیزو چارو وزارت له لوري تر ۷ زرو څخه ډېرو له اعتیاد څخه رغېدلو اشخاصو ته فني او حرفوي زدهکړې ورکړل شوې دي، چې له نېکمرغه دا برنامه په بلخ ولایت کې هم پیل او نن یې د پرانېستې شاهدان یو.
مولوي محمد زاهد احمدزي زیاته کړه: ۵۰۰ تنو ته د خیاطۍ، بوټګنډلو، بېګګنډلو، د برېښنايي وسایلو د ترمیم او د ودانیو د برېښنا په حرفو کې د شپږو میاشتو لپاره د زدهکړو لړۍ پیل او هڅه کېږي، چې تر فراغت وروسته پر هغوی کاري وسایل هم ووېشل شي، ترڅو د ماهرو کاریګرو په توګه د خپلو کورنیو د نفقې د تأمین مسؤلیت واخلي او د سالمو انسانانو په څېر بیاځلې له ټولنې سره یو ځای شي.
د کار چارو معین د خپلو خبرو په دوام کې د یتیمو او بېسرپرستو ماشومانو څخه د ملاتړ، معلولو مجاهدینو ته د فني او حرفوي زدهکړو د برنامې د پېلېدو، بېرته راستنېدونکو هېوادوالو ته د کارموندنې او بهرنیو هېوادونو ته د ماهرو کاریګرو د اعزام په برخو کې د وزارت فعالیتونو ته په اشارې سره، ژمنه وکړه چې د دې برنامو د پراختیا لپاره به له هر ممکن فرصت څخه ګټه واخیستل شي؛ ترڅو په هېواد کې د بیکارۍ کچه راټیټه شي.
ورپسې د بلخ ولایت مرستیال والي مولوي نورالهادي ابوادریس د کار او ټولنیزو چارو وزارت له هڅو او فعالیتونو څخه په مننې سره، د کار چارو معین او ورسره مل پلاوي ته ښه راغلاست ووایل او په دې ولایت کې یې د تر کار لاندې پروژو په اړه له ګډونوالو سره معلومات شریک کړل.
