تر څلورو کلونو وروسته درې تنه ورک شوي تنکي ځوانان خپلې کورنۍ ته وسپارل شول
درې تنه ځوانان چې نږدې څلور کلونه وړاندې له خپلې کورنۍ څخه جلا او د کار او ټولنیزو چارو وزارت په حمایوي مرکزونو کې یې ساتنه او پالنه کېده، د کورنۍ له پیدا کېدو وروسته د دې وزارت د ټولنیزو چارو د معین په حضور خپل پلار ته وسپارل شول.
په همدې مناسبت جوړه شوې ناستې ته د کار او ټولنیزو چارو وزارت د ټولنیزو چارو معین مولوي عبیدالله امینزاده خپلو خبرو کې وویل: له نېکمرغه د دې وزارت د کارکوونکو په هڅو تر نږدې څلورو کلونو وروسته د درېو تنو ځوانانو، چې دوه تنه یې وروڼه او یوه یې خور ده، کورنۍ یې پیدا او نن خپل پلار ته وسپارل شول، چې دا د خپلو ولسونو څخه د ساتنې په برخه کې د افغانستان د اسلامي امارت په ځانګړې توګه د کار او ټولنیزو چارو وزارت د مسؤلینو د پاملرنې څرګندونه کوي. مولوي امینزاده زیاته کړه: په دې موده کې د دې وزارت اړوند حمایوي مرکزونو کې د یادو ځوانانو سالمه روزنه او پالنه کېده او هم په مختلفو حرفو کې هغوی ته زدهکړې ورکړل شوې، چې له دې سره به وتوانېږي، ترڅو په راتلونکي کې د خپلې کورنۍ نفقه برابره او یو سوکاله ژوند ولري.
ورپسې د ماشوم ساتنې رئیس مولوي سعدالدین مطمئن هم خپله لنډه وینا کې له یتیمو او بېسرپرستو ماشومانو څخه د ساتنې په برخه کې د دې وزارت په مسؤلیتونو رڼا واچوله او هم یې له هېوادوالو وغوښتل، که چېرې د دوې ماشومان ورک او یا د بل هېوادوال ورک شوی ماشوم پیدا کوي، نو د کار او ټولنیزو چارو وزارت سره دې په اړیکه کې شي، ترڅو له دې لارې یې کورنۍ پیدا شي.
په همدې ترتیب د ټولنیزو تأمیناتو د تنظیم رئیس شیخ نورالله مکي هم زیانمنو ډلو ته د رسېدنې په برخه کې د دې وزارت له هڅو څخه په یادونې سره وویل: د یادو ځوانانو پلار چې په نشهيي توکو روږدی وو، درملنه یې شوې او هم ورته فني او حرفوي زدهکړې ورکړل شوې دي او له دې وروسته به په سالمه توګه د خپلو اولادونو د سرپرستۍ مسؤلیت په غاړي ولري.
په پای کې د ورکو شویو ځوانانو د کورنۍ یو تن غړي سید حسین موسوي، د کار او ټولنیزو چارو وزارت له هڅو او فعالیتونو څخه د خوښۍ په څرګندولو سره وویل: چې د دې وزارت په هڅو نن د دوی ورک شوي عزیزان بیاځلې ورسره یو ځای شول.
د ویلو ده، چې د تېرې پنجنشبې په ورځ هم د دې وزارت له لوري د کوزې پښتونخوا یو تن ناروغ ماشوم، چې د افغان کډوالو سره یو ځای افغانستان ته را اوښتی وو، تر ډېرو هڅو وروسته یې کورنۍ پيدا او تر لازمې درملنې وروسته خپل پلار ته وسپارل شو.
