تورخم ته د کار او ټولنیزو چارو وزارت استول شوی پلاوی، د بیا راستنېدونکو هېوادوالو د ثبت لړۍ ته دوام ورکړې دی
تورخم ته د کار او ټولنیزو چارو وزارت استول شوي پلاوي راستیندونکو هیوادوالو او په ځانګړې ډول زیانمنو اقشارو ته د خدماتو وړاندې کولو په لړ کې د خپلو تېرو فعالیتونو په دوام، پرون د جمعې په ورځ هم د پاکستان څخه د بېرته راستنېدونکو هېوادوالو د ثبت او د هغوی د تنظیم په برخه کې خپل فعاله ونډه درلوده.
د وزارت مقام سلاکار او تورخم ته د استول شوي پلاوي د مشر قاري عبدالرحیم ودود په وینا د کار او ټولنیزو چارو وزارت کارکوونکي چې ۲۴ساعته او په دوو کاري ډلو کې فعالیت کوي؛ توانیدلي چې تېرو دریو ورځو کې ۳۱۳۵تنه بېرته راستنېدونکي سیستم کې ثبت کړي چې له دې ډلې ۳۱۲تنه د بکلوریا؛ ۳۰۸تنه د لسانس ترکچې لوړې زدهکړې لري، او همدارنګه ۱۰۱۵تنو په بیلابیلو برخو کې فن او حرفې ته لاسرسۍ درلود.
سربیره پردې د کمیټې غړي بېراته راستنېدونکو هېوادوالو ته د ترانسپورت د ښه تنظیم، روغتیايي خدماتو ته د هغوی لاسرسۍ او د اړتیا وړ نورو مواردو په برخه کې هم رغنده فعالیتونه کړي دي او دا لړۍ دوام لري.
د یادولو وړ ده چې د بیاراستنیدونکو هیوادوالو د فن او حرفې او د تحصیل کچې د تثبیت څخه موخه په نږدې راتلونکې هغوی ته د کاري فرصتونو په برابرولو کې اسانتیاوې دي.
