د روزنتونونو تعديل شوې مقررې له مخې د بهرنيو تحصيلي بورسونو درې سلنه سهميه د روزنتونونو زده کوونکو ته ور کول کيږي.

دغه خبرې د ټولنيزو چارو مرستيال غلام حيدر جيلاني د تهيه مسکن روزنتون د شاګردانو فراغت غونډه کې و کړې، نوموړي زياته کړه، چې د روزنتونونو نوې مقرره کې د بې سرپرسته ماشومانو ټولو حقوقو ته ځای ور کړل شوی او په نږدې راتلونکي کې به د عدليې وزارت له خوا چاپ شي.
د ټولنيزو چارو مرستيال غلام حيدر جيلاني همدارنګه د روزنتون فارغ شويو شاګردانو ته د مبارکۍ ترڅنګ د بې سرپرسته ماشومانو روزنه او مرسته د ټولو هيوادوالو مسؤليت ياد کړ او له ټولو يې و غوښتل، څو د هغو بې سرپرسته ماشومانو چې د روزنتونونو خدمتونو ته لاسرسی نه لري، همکاري و کړي.
په غونډه کې د روزنتونونو عمومي مشر فيضان احمد کاکړ وويل، چې هڅه کوو، څو د هيواد په ټولو ولايتونو کې بې سرپرسته ماشومانو ته روزنتونونه جوړ او د ښوونې او روزنې زمينه ورته برابره کړو.
کاکړ زياته کړه، چې روان کال کې د ۶۸ دولتي او خصوصي روزنتونونو له لارې د لس زره بې سرپرسته ماشومان ملاتړ شوی او د روزنتونونو له خدمتونو څخه برخمن شوي دي.
دغه پروګرام د تهيه مسکن روزنتون د غونډو تالار کې جوړ شوی وو، چې د روزنتونونو مشرانو او يو شمير نورو کارکوونکو ته د جمهوري رياست او اجرائيه رياست له خوا د افتخاري ستاينليکونو، ممتازو او فارغ شويو شاګردانو ته د فراغت پاڼو او ډاليو ويشلو او د بې سرپرسته ماشومانو د لا خوشحالي په موخه د هيواد د محبوبو سندر غاړو له خوا د کنسرت په وړاندې کولو سره پای ته و رسيده.