د سرک سر دوه سوه کارکرو ماشومانو ته د نغدي مرستې ويش
دوه سوه تنه د سرک سر کارګرو ماشومانو سره د کار او ټولنيزو چارو وزارت له خوا يو ميليون افغانۍ مرسته و شوه.
د مرستو د ويش پر مهال د ماشومانو د ساتنې شبکې رئيس نجيب الله اخلاقي و ويل: دغه ماشومان چې د کرونا ويروس او امنيتي ستونزو څخه زيانمن شوي وو، د کار او ټولنيزو چارو وزارت دټولنيزو کارمندانو له خوا د يوې شفافې پروسې له لارې را ټول شوي دي.
نجيب الله اخلاقي زياته کړه: دغه مرسته د کار او ټولنيزو چارو وزارت له بودجې څخه برابره شوې او د دې قشر د لا زيات ملاتړ په موخه مو د يونيسف ادارې سره خبرې کړي، چې نږدې راتلونکي کې به د هيواد اته نورو ولايتونو کې هم د يونيسف ادارې په مالي مرسته نغدي مرسته و شي.
د کار او ټولنيزو چارو وزير بشير احمد ته ينج وويل: لکه څنګه چې د وزارت له نوم څخه ښکاري، ټولنيزو ستونزو په ځانګړي توګه زيانمن شويو ماشومانو ته رسيدنه زموږ له کاري لومړيتونو څخه دي، چې له ښه مرغه نن هم دوه سوه تنه دغو زيانمن شويو او د سرک سر کارګرو ماشومانو ته د نغدي مرستو د ويشلو شاهد يو.
ښاغلي ته ينج ماشومانو ته په خطاب وويل: تاسې د هېواد راتلونکي جوړوونکي يئ، درسونه مو په ښه توګه زده کړئ، ځکه دا وطن تاسو ته اړتيا لري.
د ويلو ده، چې دې پروګرام کې هر ماشوم سره پنځه پنځه زره افغانۍ مرسته و شوه او نږدې راتلونکي کې به اوه سوه نورو سروې شويو ماشومانو سره هم نغدي مرسته و شي.
