د ټولنیزو چارو معین د یونیسف دفتر له مرستیالې سره وکتل
د کار او ټولنیزو چارو وزارت د ټولنیزو چارو معین شیخ عبدالبر د خپل کار په دفتر کې د افغانستان لپاره د یونیسف دفتر له مرستیالې مېرمن روشن مرتضی او مل پلاوي سره په کتنه کې د ځینو اړینو مواردو په اړه خبرې وکړې.
کتنه کې د ټولنیزو چارو معین مېلمنو ته د ښه راغلاست سربېره وویل: د کار او ټولنیزو چارو وزارت کاري ساحه پراخه او اړینه برخه یې د زیانمنو اقشارو څخه ملاتړ او د دوی ستونزو ته رسېدنه ده، چې په دې برخه کې نه ستړې کېدونکې هڅې شوې او په راتلونکي کې د دې هڅو پراخېدو ته متعهد یو. شیخ عبدالبر همدارنګه زیاته کړه: دې وزارت په خپلو روزنتونونو کې سلګونو تنو یتیمو او بېسرپرسته ماشومانو ته د ښوونې او روزنې ترڅنګ؛ د ژوندانه نور سهولتونه برابر کړي دي او د دوی مصارف له خپلې داخلي بودجي تمویلوي.
شیخ عبدالبر د خپلو خبرو په دوام کې وویل: له ماشومانو څخه ملاتړ او ساتنه د کار او ټولنیزو چارو وزارت د مسؤلیتونو یوه برخه ده؛ نو باید د یونیسف دفتر سره نږدې او پیاوړې کاري اړیکې موجودې وي، ترڅو په مشترک ډول د افغانستان له ماشومانو او د دوی له حقونو څخه ملاتړ وشي.
ورپسې مېرمن روشن مرتضی د ماشومانو څخه د ساتنې او دوی ته د سهولتونو د رامنځته کولو له امله د کار او ټولنیزو چارو وزارت د هڅو څخه د مننې ترڅنګ وویل: هیله منده یم، چې د یونیسف دفتر او د کار او ټولنیزو چارو وزارت ترمنځ د همکاریو ساحه پراخه شي، ترڅو په ګډه توګه و کولای شو د افغان ماشومانو د ژوندانه د ښه کېدو په برخه کې اړین اقدامات وکړو. آغلې روشن مرتضی همدارنګه د خپلو راتلونکو پروژو په اړه معلومات شریک کړل، چې په پلي کېدو سره به یې په مختلفو ولایتونو کې ډېر شمېر اغېزمن ماشومان تر پوښښ او حمایت لاندې ونیول شي.
