د ټولنیزو چارو معین په روزنتونونو کې د مېشتو زدهکوونکو د وضعیت ارزونه وکړه
د کار او ټولنیزو چارو وزارت، د ټولنیزو چارو معین الحاج مولوي عبیدالله امینزاده، ننګرهار او کونړ ولایتونو ته د خپل سفر په ترڅ کې د دې ولایتونو په روزنتونونو کې د مېشتو زدهکوونکو وضعیت او هغوی ته د خدماتو د وړاندې کېدلو څرنګوالی وڅاره.
الحاج مولوي عبیدالله امینزاده په روزنتونونو کې زدهکوونکو ته د اعاشې، اباتې، د ښوونیز بهیر، روغتیايي خدماتو د وړاندې کولو او د لیلیې چارو څخه د لیدنې ترڅنګ، مسؤلینو ته وویل چې تر پخوا دې لا ډېرې هڅې وکړي او په اړوندو برخو کې دې خدمات ګړندي کړي. په همدې توګه یې زیاته کړه، چې د روزنتونونو زدهکوونکو ته د روغتیايي خدمتونو د ترسره کېدلو په موخه د کار او ټولنیزو چارو وزارت او د یوه خصوصي روغتون ترمنځ هوکړه شوې، ترڅو د اړتیا په صورت کې د ناروغو زدهکوونکو لازمه درملنه وشي.
د ټولنیزو چارو معین د روزنتونونو په برخو کې د ننګرهار او کونړ ولایت د کار او ټولنیزو چارو د رئیسانو ځیني وړاندیزونه او غوښتنې هم واورېدې او د حل په موخه یې د پاملرنې ډاډ ورکړ.
