د چاپيريال ساتنه د ټولو هيوادوالو مسؤليت دی.
دغه خبره د کار او ټولنيزو چارو وزارت سرپرست سيد انور سادات د چاپيريال ساتنې ملي ادارې مرستيال انجينير عزت الله صديقي او د افغانستان لپاره د ملګرو ملتونو د صنعتي پراختيا ادارې مشر محمد شاکر مجيدي سره په ناسته کې و کړه.
په ناسته کې د کار او ټولنيزو چارو وزارت سرپرست سيد انور سادات، د افغان ـ کوريا انستيتوت د يخچال، ايرکنديشن څانګو سره د چاپيريال ساتنې ملي ادارې په همغږۍ او د افغانستان لپاره د ملګرو ملتونو صنعتي پراختيا ادارې په مرسته د مډرن وسائيلو مرستې څخه مننه و کړه.
ښاغلي سادات و ويل: د چاپيريال ساتنه د ټولو هيوادوالو دنده ده او بايد هر هيوادوال خپل ايماني او وجداني مسؤليت ادا کړي، نوموړي زياته کړه، چې د کار او ټولنيزو چارو وزارت به هم د مخربه ګازاتو څخه د مخنيوي برخه کې د ايرکنديشنونو د مخربه ګازاتو د مخنيوي لپاره ګڼ شمير هيوادوال و روزي او د چاپيريال ساتنې ادارې په همکارۍ به د افغان ـ کوريا انستيوت ياده څانګه نوره هم غني کړي.
د چاپيريال ساتنې ملي ادارې مرستيال او د افغانستان لپاره د ملګرو ملتونو صنعتي ادارې مشر د خپلو خبرو په ترڅ کې د چاپيريال ساتنې برخه کې د وزارت هڅې و ستایلې او د لا زياتو همکاريو ژمنه يې و کړه.
د ويلو ده، چې د کار او ټولنيزو چارو وزارت اړوند افغان ـ کوريا انستيتوت هر کال ياده څانګه کې ګڼ شمير هيوادوال روزي، چې له دې وروسته به د مډرنه وسائلو په کارولو سره د يادې څانګې ظرفيت او خدمتونه لا زيات شي.