د کار او ټولنیزو چارو وزارت په هڅو د دې وزارت اړوند د مختلفو ریاستونو کارکوونکو ته د کمپیوټر د مختلفو پروګرامونو د زده‌کړې دوه میاشتنی او د مدیریت اړوند شپږ ورځیني روزنیز ورکشاپونه جوړ شول.  

د دې ورکشاپونو په پیل غونډې کې د کار او ټولنیزو چارو وزارت د کار انسټېټوت رئیس شریف الله شرافت په خپلو خبرو کې وویل: د کار او ټولنیزو چارو وزارت د خپلو نور مسؤلیتونو سربېره د امارتي او غیر امارتي ادارو د کارکوونکو د غوښتنو په اساس په مختلفو برخو کې د ظرفیت لوړونې لنډمهاله او اوږدمهاله عملي او نظري برنامې په لاره اچوي، ترڅو له دې لارې ګڼ شمېر کارکوونکو ورڅخه مستفید شي.  شریف الله شرافت همدا راز د خپلو راتلوونکو برنامو په اړه معلومات شریک او ژمنه یې وکړه، چې یادو روزنیزو برنامو ته به په راتلونکې دوام ورکوي. 

نوموړي همدارنګه د دې ورکشاپونو له ګډونوالو وغوښتل، چې له دې پروګرامونو څخه د ترلاسه شویو تجربو او مهارتونو څخه په استفادې به د دوی په ورځنیو چارو کې د پام وړ ښه‌والی او د ګټورو خدماتو د وړاندې کولو په برخه کې چټکتیا راولي.