د کار او ټولنيزو چارو وزارت د ملکيتونو معلومولو اړوند د تصميم نيولو ناسته
دغه ناسته چې د کار او ټولنيزو چارو وزارت سرپرست ملا عبدالولي څارنوال( حاجي وارث) په مشرۍ جوړه شوې وه؛ په کې د کار چارو مرستيال مخدوم عبدالسلام سعادت، د وزارت مقام د دفتر رئيس مولوي شريف الله، د مالي چارو رئيس خالد نويد، د اداري او خدماتي چارو رئيس سيد فهيم هاشمي او په ټولنيزو چارو کې د وزارت مقام سلاکار رياض احمد هم ګډون درلود.
پيل کې د اداري او خدماتي چارو رئيس سيد فهيم هاشمي، کابل ښار کې د کار او ټولنيزو چارو وزارت د ملکيتونو ليست او مشخصات د وزارت رهبرۍ سره شريک کړل او د هغو ځمکو اړوند چې تعميرونه په کې جوړ شوي او يا هم غصب شوي، په اړه يې هر اړخيز بحث و شو، چې په پايله کې د مالي او اداري چارو مرستيال مولوي دين محمد حقبين په مشرۍ او د اړوندو برخو په عضويت دوه کاري کمېټې جوړې او مؤظف شول؛ څو کابل ښار کې د کار او ټولنيزو چارو اړوند سپينې نمرې او غصب شوې ساحې تر څيړنې لاندې و نيسي او په دولس کاري ورځو کې خپل کاري راپور د وزارت مقام سره شريک کړي.
همدارنګه د کار او ټولنيزو چارو وزارت سرپرست د اداري او خدماتي چارو رئيس ته دنده ورکړه، چې ټولو ولايتي رئيسان ته هم يو متحدالمال مکتوب وليږي؛ څو په ولايتي سطحه هم د کار او ټولنيزو چارو وزارت اړوند ځمکو او جايدادونو بيرته ترلاسه کولو برخه کې جدي کار وکړي او خپل کاري راپور د وزارت مقام سره شريک کړي.
