د کار او ټولنيزو چارو وزارت سرپرست وزير د روزنتونونو عمومي رياست څخه ليدنه وکړه
د کار او ټولنيزو چارو وزارت سرپرست وزير الحاج ملا عبدالمنان عمري په داسې حال کې چې د وزارت مقام د دفتر رئيس ملا شرف الدين شرف او د وزارت يو شمير نورو رئيسانو يې هم ملتيا کوله د روزنتونونو عمومي رياست څخه ليدنه وکړه.
نوموړي همدارنګه د روزنتونونو عمومي رياست له مسؤلينو سره تر ليدنې وروسته د وزارت اړوند د علاوالدين او تهيه مسکن روزنتونونو او د ماشومانو دوه حمايوي مرکزونو څخه هم ليدنه وکړه او د يادو روزنتونونو او مرکزونو له شاګردانو سره يې له نږدې وکتل.
د کار او ټولنيزو چارو وزارت سرپرست وزير الحاج ملا عبدالمنان عمري د يادو مرکزونو د مسؤلينو او شاګردانو ستونزې واوريدې او د حل په موخه يې اړونده مسؤلينو ته لازمې لارښوونې او سپارښتنې وکړې.
الحاج ملا عبدالمنان عمري د روزنتونونو له مختلفو برخو څخه د ليدنې پر مهال مسؤلينو ته لارښوونه وکړه؛ څو د يادو شاګردانو د غذا، يونيفورم، مسجد او روزنتونونو د ترميماتو برخه کې جدي کار وکړي او خپل وړانديزونه او اجرات د وزارت مقام سره شريک کړي.
