د کار او ټولنیزو چارو وزارت د کار چارو معین الحاج مولوي محمد زاهد احمدزي ننګرهار ولایت ته په خپل کاري سفر کې، د دې ولایت د کار او ټولنیزو چارو په ریاست کې کورنیو وګړو ته د کار جواز د وېش، د مهارتونو د پراختیا، د ټولنیز خوندیتوب او د بې‌سرپرستو ماشومانو د معلوماتو او ادغام برېښنايي سیستمونه پرانېستل.

هغې غوڼدې ته، چې په همدې مناسبت د ولايتي بېلابېلو مسئولینو په ګډون جوړه شوې وه، د کار چارو معین وویل:  برېښنايي حکومتولي د نظم، سهولت او شفافیت په رامنځته کېدو، د جعل او د وخت د ضایع کېدو د مخنیوي او په خپل وخت هېوادوالو ته د چټکو خدماتو د وړاندې کولو په لارو کې اړینه او هم د وخت اړتیا ده. خوښ یم، چې تر پلازمېنې کابل وروسته ننګرهار ولایت کې هم دا لړۍ پیل شوه، چې په پلي کېدو سره به یې د فني او حرفوي زده‌کړو په پروګرام کې نظم او دقت رامنځته، د مرستو په وېش کې به عدالت پلی او د بېوزلو کورنیو او ماشومانو دقیق ارقام به په لاس راشي او هم به له دې وروسته د کار جوازونه په برېښنايي ډول ووېشل شي.

ورپسې د ننګرهار مرستیال والي مولوي عزیزالله مصطفی، له کابل څخه ورغلي پلاوي ته د ښه راغلاست ویلو سربېره، د یادو برېښنايي سیستمونو له پرانېستلو خوښي څرګنده او ننګرهار ولایت ته د پاملرنې په پار یې د کار او ټولنیزو وزارت له مشرتابه څخه مننه وکړه.

 همداراز د ننګرهار ولایت د کار او ټولنیزو چارو رئیس د پرانېستلو شویو سیستمونو په اړه معلومات شریک او ژمنه یې وکړه، چې اړوند کارکوونکي به هڅه کوي، ترڅو له هغې څخه په سالمې استفادې سره لازم خدمات وړاندې کړي.

په پای کې د کار چارو معین د یاد ریاست له روزنتون او د فني او حرفوي زده‌کړو له مرکز څخه هم لیدنه ترسره او کارکوونکو ته یې ځینې لازمې سپارښتنې او لارښوونې وکړې.