د کار او ټولنیزو چارو سرپرست وزیر په افغانستان کې د کار نړیوال سازمان له نوي رئیس سره وکتل
د کار او ټولنیزو چارو وزارت سرپرست وزیر الحاج ملا عبدالمنان عمري، په داسې حال کې چې د کار چارو معین هم حضور درلود، په افغانستان کې د کار نړیوال سازمان له نوي رئیس ټیټي هیبااکاري سره د پېژندګلوۍ ناسته وکړه. ناسته کې دواړو لوریو د غوره کار د ترویج، کارموندنې، د فني او حرفوي زده کړو پراختیا، د ځوانانو لپاره د کاري فرصتونو د رامنځته کولو او د کار بازار د لا ښهوالي په اړه خبرې اترې وکړې. الحاج ملا عبدالمنان عمري، وویل: دا وزارت ژمن دی، ترڅو په هېواد کې د مختلفو لارو چارو څخه په استفادې د بېکارۍ کچه راټیټه، د ځوانانو لپاره په مختلفو برخو کې کاري فرصتونه ایجاد او له هېواد څخه بهر په قانوني توگه د افغان ماهرو کاریگرو د لېږد زمینه برابره کړي. سرپرست وزیر، همدا راز د کار نړیوال سازمان څخه وغوښتل، چې د کار او ټولنیزو چارو وزارت سره په همغږۍ، د افغانستان په مختلفو سیمو کې خپلې پروژې تطبیق کړي. ورپسې د کار چارو معین الحاج مولوي محمدزاهد احمدزي هم په خپلو خبرو کې وویل: د افغان کارکوونکو ظرفیت لوړول، د کار اړوند تقنیني اسنادو پلي کول او په دې برخو کې له نړیوالو ادارو سره همغږي زمونږ لپاره مهم لومړیتوبونه دي او د دې موخو د ترلاسه کېدو لپاره اړینه ده، چې ټولې خواوې په ځانگړې توگه د کار نړیوال سازمان له دې وزارت سره نږدې همغږي ولري. په پای کې، په افغانستان کې د کار نړیوال سازمان رئیس ټیټي هیباکاري، په مختلفو برخو کې د کار او ټولنیزو چارو وزارت له فعالیتونو څخه د خوښۍ سربېره، د دې سازمان د فعالیتونو او برنامو په اړه د معلوماتو شریکولو ترڅنگ ژمنه وکړه، چې افغان وګړو ته به د سهولتونو د برابرېدو په موخه له دې وزارت سره د کار اړوند برنامو او د اړتیا وړ نورو برخو کې خپلې اړیکې پراخوي.
